Almatyda «Tańjaryq oqýlary» ótedi

ASTANA. QazAqparat - 2016 jyldyń 19 sáýirde Qazaq memlekettik qyzdar pedagogıkalyq ýnıversıtetinde Almaty qalasyndaǵy JOO stýdentteri arasynda «Osy tań kimniń tańy?» atty dástúrli Tańjaryq oqýlary ótedi. Táýelsizdiktiń 25 jyldyǵyna oraı ótkiziletin shara Alash urandy ádebıettiń beldi ókili, ult qaıratkeri, aqyn-aǵartýshy Tańjaryq Joldyulynyń ómiri men shyǵarmashylyǵyn jas urpaqqa keń kólemde nasıhattaýdy maqsat etedi, dep habarlady osy joǵary oqý ornynyń baspasóz qyzmeti.

Tańjaryq Joldyuly - Alash ıdeıasyn qytaıdaǵy qazaqtarǵa nasıhattap, halyqty oıatqan qaıratker tulǵa. 1934-1935jj Quljada alǵashgazetin shyǵaryp redaktory boldy. Tuńǵysh qazaq teatryn ashyp «Shuǵanyń belgisi» qoıylymyn qoıyp, ózi basty róldi oınady. Mektepter ashyp, aǵartý isin jandandyrdy. Ultty oıatqan is-áreketi men shyǵarmalary bıleýshilerge unamaı eki márte túrmege qamaldy. Adam aıtqysyz azaptaýdy kórse de moıymaı ór rýhty óleń, tolǵaý, dastan, ánder jazdy. Deni búgingi urpaqqa jetti. Aqyn shyǵarmalary arqyly ótken ǵasyrdaǵy qytaıdaǵy qazaqtardyń saıası-áleýmettik ómiri, qıyn-qystaýǵa toly taýqymetti tarıhy, mádenıeti men óneri týraly birshama qundy maǵulmat alýǵa bolady. Aqynnyń ómiri men eńbekteri jaıly kóptegen zertteýshilerdiń jaqsy pikirleri bar.

Ult qaıratkeriniń ónegeli ómiri men shabytty shyǵarmashylyǵyn keń kólemde nasıhattaý maqsatynda «Halyqaralyq Tańjaryq zertteý qoǵamdyq qory» quryldy. Jastar arasynda jyl saıyn dástúrli túrde ótkiziletin kezekti Tańjaryq oqýlarynda atalǵan qordyń tusaýy kesiledi. Aqyn ómiri men eńbekteri tóńireginde stýdentterdiń kózqarasy pen pikiri tyńdalady. Jastar aqyn óleńderin mánerlep oqyp, suraqqa jaýap berý arqyly synǵa túsip baq synaıdy. Igi sharaǵa esimi elge belgili ádebıetshi, zertteýshi, aqyn, jazýshy, jýrnalıster jáne oqytýshy, stýdentter qatysady. Tanymal ánshiler Tańjaryq ánderi men tolǵaýlaryn oryndaıdy.