Almatyda sot Denıs Ten ólimine kúdiktilerdiń qamaý merzimin taǵy 15 táýlikke sozdy

ALMATY. QazAqparat - Almatyda Denıs Tenniń ólimine kúdikti 3 adamdy  qamaýda ustaý merzimi taǵy 15 táýlikke sozyldy, dep habarlaıdy QazAqparat tilshisi. Bul týraly qalalyq sottyń baspasóz qyzmeti habarlady.

«Almaty aýdanaralyq mamandandyrylǵan tergeý sotynyń sheshimimen kúdiktilerdiń biri QR QK 434-baby, QR QK 24-babynyń 3-bólimi, 188-babynyń 2-bóliminiń 1-tarmaǵy boıynsha aıyptalǵan  J.Tolybaeva qamaýda 7 jeltoqsanǵa deıin otyratyn boldy. Al QR QK 188-babynyń 2-bóliminiń 1 tarmaǵy, QR QK 99-babynyń 2-bólimimen, 192-babynyń 2-bólimimen qylmystyq jaýapkershilikke tartylyp otyrǵan A. Qudaıbergenov 4 jeltoqsanǵa deıin qamaýda otyratyn boldy. QR QK 99-babynyń 2-bólimimen, 192-babynyń 2-bólimimen qylmystyq jaýapkershilikke tartylyp otyrǵan Nuraly Qııasovty qamaýda ustaý merzimi 15 táýlikke, ıaǵnı 3 jeltoqsanǵa deıin uzartyldy», - dedi qalalyq sottyń baspasóz hatshysy Dıas Mahambetov.

Eske salsaq, qazaqstandyq mánerlep syrǵanaýshy Denıs Ten 19 shilde kúni pyshaq jaraqatynan qaza bolǵan edi. Oqıǵa Qurmanǵazy men Baıseıitova kósheleriniń qıylysynda 19 shildede túski saǵat 15:00-der shamasynda bolǵan. Sportshy kóliginiń aınasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denıs Tenge pyshaq suǵyp alǵan. Ol oń jaq sanynyń joǵarǵy tusynan jaraqat aldy. 25 jastaǵy Ten úsh lıtr qan joǵaltyp, aýrýhanaǵa óte aýyr jaǵdaıda jetkizildi.

Biraq Almaty qalalyq densaýlyq saqtaý basqarmasynyń basshysy Serikbol Mýsınov qosymsha qan qajet emestigin jáne resýrstar jetkilikti ekendigin málim etken bolatyn. 2,5 saǵatqa jalǵasqan reanımatsııalyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olımpıada júldegeri qaıtys boldy.

 Adam óltirý babymen qylmystyq is qozǵaldy. Keıin belgili bolǵandaı, sportshynyń ólimine qatysy bar kúdiktiler ustalyp, qylmystaryn moıyndady.