Almatyda sıntetıkalyq esirtki satýmen aınalysqan áıel ustaldy

ALMATY. QazAqparat- Almatyda sıntetıkalyq esirtki satqan áıel ustaldy. Onyń qylmystyq áreketi jedel jáne arnaıy is-sharalar kezinde rastaldy, dep habarlaıdy QazAqparat tilshisi.

Almaty qalalyq polıtsııa departamentiniń málimetinshe, kúdikti Seıfýllın dańǵyly boıyndaǵy úılerdiń biriniń aýlasynan ustalǵan.

«Ruqsat etilgen jeke tintý barysynda kúdikti K. esimdi azamatshadan oqshaýlanǵan qyzyl tústi býma tabylyp tárkilendi, onyń ishinde ózine tán ıisi bar aq tústi untaq zaty bar polıetılen oramy boldy. Sodan keıin ustalǵan azamatshanyń turǵylyqty jerin tintý kezinde 3 elektrondy tarazy, polıetılen paketter jáne medıtsınalyq tamshýyrlar tabylyp, tárkilendi. Saraptama taǵaıyndaldy»,- dedi Almaty qalalyq PD esirtki qylmysyna qarsy kúres basqarmasynyń bastyǵy Erlan Álmaǵambetov

Sonymen qatar K. esimdi kúdikti sıntetıkalyq esirtki satqanyn, ony ınternet arqyly satyp alatynyn moıyndaǵan.

Esirtki satýshy QR Qylmystyq is júrgizý kodeksiniń 128-babyna sáıkes ýaqytsha ustaý ızolıatoryna qamaldy.

Atalǵan derek boıynsha sotqa deıingi tergeý bastaldy.