Almatyda sheteldikter úshin jańa týrıstik tólem belgilenedi

ALMATY. QazAqparat - Almaty máslıhaty megapolıske keletin sheteldikterden 1725 teńge kóleminde jańa týrıstik jarna alý týraly jobany qoǵamdyq talqylaýǵa shyǵardy, dep habarlaıdy QazAqparat tilshisi.

Almaty máslıhaty týrıstik alym mólsherlemeleri ótken jyldyń sáıkes kezeńimen salystyrǵanda ózekti statıstıkalyq derekter negizinde aıqyndalatynyn túsindirdi.
Bul rette, sheteldikter úshin týrıstik salyqty tóleý qaǵıdalary ótken kúntizbelik jyldyń sáıkes kezeńimen salystyrǵanda týrısterdi ornalastyrý oryndarynda sheteldik týrıster sany artqan jaǵdaıda týrıstik salyqtyń mynadaı mólsherlemelerin belgileıdi: 5%-ǵa deıin – 0,2 AEK mólsherinde; 5-ten 10%-ǵa deıin – 0,3 AEK mólsherinde; 10-nan 15%-ǵa deıin – 0,4 AEK mólsherinde; 15% jáne odan joǵary - 0,5 AEK mólsherinde.
«QR Strategııalyq josparlaý jáne reformalar agenttiginiń ulttyq statıstıka bıýrosynyń derekterine sáıkes eki kezeńmen salystyrǵanda (2021/2022jáne 2022/2023 jyldar) Almaty qalasynda kelý týrızmi boıynsha qyzmet kórsetilgen kelýshiler sany 15% - dan asady. Osyǵan baılanysty joba týrısterdi ornalastyrý oryndarynda sheteldikter úshin týrıstik jarna mólsherlemesin týrısterdi ornalastyrý oryndarynda bolǵan árbir táýlik úshin 0,5 aılyq eseptik kórsetkish mólsherinde bekitýdi kózdeıdi»,-delingen qujatta.
Sheteldikter úshin týrıstik alym qalalar men oblystardaǵy hostelderdi, qonaq úılerdi, jalǵa beriletin turǵyn úılerdi qospaǵanda, týrısterdi ornalastyrý oryndarynda bolǵan árbir kún úshin týrısterden alynady. Tólenetin týrıstik alym somasy turý qunyna engizilmeıdi.
Qujat Ashyq NQA veb-saıtynda 28 tamyzǵa deıin ornalastyrylǵan.