Almatyda Sherhan Murtazanyń memorıaldy taqtasy ashyldy
Saltanatty ashylýǵa qala ákimi Baqytjan Saǵyntaev qatysty.
«Sherhan Murtazanyń baı ári ómirsheń shyǵarmashylyq murasy keńinen ashylyp, tereńirek zerttelýi kerek. Halqymyzdyń súıikti perzentteriniń esimderi máńgi saqtalyp, ulyqtalýy úshin barlyǵyn jasaımyz», - dep jazdy ákim óziniń Twitter -degi paraqshasyna.
Aıta keteıik, jazýshy ótken jyldyń qazan aıynda 86 jasynda dúnıeden ozdy.
Sherhan Murtaza 1932 jyly Jambyl oblysynyń Jýaly aýdanynda dúnıege kelgen. Ol 1955 jyly M.V.Lomonosov atyndaǵy Máskeý memlekettik ýnıversıtetiniń jýrnalıstıka fakýltetin bitirgen. Jastyq shaǵynda «Lenınshil jas» pen «Sotsıalıstik Qazaqstan» gazetiniń tilshisi bolyp qyzmet etken. 1963-1970 jyldar aralyǵynda «Lenınshil jas» gazetiniń redaktory qyzmetinde bolǵan. Odan keıingi kezderi «Jazýshy» baspasy men «Jalyn» almanahynyń, «Juldyz» jýrnalynyń Bas redaktory, Qazaqstan Jazýshylar odaǵy basqarmasynyń ekinshi hatshysy, «Qazaq ádebıeti» gazetiniń bas redaktory ári Qazaqstan Jazýshylar Odaǵy basqarmasynyń hatshysy qyzmetterin atqarǵan.
1989-1992 jyldary «Egemen Qazaqstan» gazetiniń bas redaktory, 1992-1994 jyldary - Qazaqstan Respýblıkasy memlekettik teleradıo kompanııasynyń tóraǵasy qyzmetterin atqardy. QR Parlamentiniń Májilis depýtaty boldy.
Jazýshynyń ár jyldary jazylǵan «Tabylǵan teńiz», «Belgisiz soldattyń balasy», «Ahmetjannyń anty», «Myltyqsyz maıdan» povesteri, «41-jylǵy kelinshek», «Internat nany» áńgimeleri, «Qara marjan», «Júrekke ájim túspeıdi», «Ne jetpeıdi?», bes kitaptan turatyn «Qyzyl jebe», «Aı men Aısha» romandary qazaq prozasyna qosqan ólsheýsiz úlesi bolyp qalary sózsiz.
