Almatyda saılaý qalaı ótip jatyr

ALMATY. QazAqparat – Almatyda saılaý ýchaskelerinde daýys berý protsesi qalaı ótip jatqany týraly baqylaýshylar pikirimen bólisti, dep habarlaıdy QazAqparat tilshisi.

Almaly aýdanyndaǵy №109 saılaý ýchaskesiniń baqylaýshysy Raýshan Orazalıevanyń aıtýynsha, saılaý ýchaskesinde daýsyn berýge kelgen azamattar sany tolastar emes.

«Saılaýdyń bastapqy kezeńi belsendi ótip jatyr. Biz tańerteńnen beri daýys berý protsesin baqylap jatyrmyz. Ázirge eshqandaı zańbuzýshylyqtar tirkelmedi. Halyq sany artyp keledi. Epıdemıologııalyq ahýalǵa baılanysty barlyq sanıtarlyq normalar saqtalyp jatyr. Daýys berýshiler maskamen kirip jatyr. Ár azamattyń dene qyzýy ólshenedi», - dedi baqylaýshy.

Aıta ketý kerek, búgin ıaǵnı, 10 qańtarda QR Parlamenti Májilisi men Máslıhat depýtattaryn saılaý bastaldy.

Almatyda 507 saılaý ýchaskesi tańǵy 07:00-den bastap ashyldy. Daýys berý oryndary «QR Saılaý týraly» zańynyń, Ortalyq saılaý komıssııasynyń talaptaryna saı keledi.

507 ýchaskede 2535 medıtsınalyq qyzmetker: 1014 dáriger, 1521 medbıke jumys isteıtin bolady. Odan bólek keıbir saılaý ýchaskeleriniń janynda Jedel járdem kezekshilik etetin bolady.

Saılaýshylar maskamen kelýge mindetteledi. Eger joq bolsa olarǵa kireberiste maska beriledi. Eger onyń dene qyzýy joǵary bolsa, daýys berýge tyıym salynady.

Daýys berýshi óz ýchaskesin 221-10-01 kýll ortalyǵy arqyly tegin bile alady nemese @sailau_almaty Telegram-bot kómegimen,sondaı-aq «Open Almaty» servıs ortalyǵynda jáne https://service.almaty.kz/ru arqyly bile alady.