Almatyda saýda nysandary qaıta ashylyp jatyr - shtab

ALMATY. QazAqparat - Almatyda 149 shaǵyn jáne orta sýpermarkettiń 140-y óz jumysyn bastady. Bul týraly Almaty qalasynyń tynys-tirshiligin qamtamasyz etýdi qalpyna keltirý jónindegi shtabtan málim etti, dep habarlaıdy QazAqparat tilshisi.

Qalada 31 saýda nysanyna zaqym kelgen, onyń ishinde «Magným» - 19 (14 joıyldy), «Toımart» - 11 (10 joıyldy), «Interfýd» - 1. Olar 14 qańtardan bastap EsentaiGourmet, «Galmart» ashýdy josparlap otyr.

Búginde barlyq 52 saýda bazary jumys isteıdi.

Qaladaǵy 220 janar-jaǵarmaı quıý beketiniń 168-si ashyldy.

Búgin jelilik emes 5 jeke janar-jaǵarmaı quıý beketin ashý josparlanýda.

Qalada 93 iri saýda nysany bar. 13 qańtardaǵy jaǵdaı boıynsha 14 saýda oıyn-saýyq ortalyǵy («Globýs», «Spýtnık», «Rıtts Palas», «Alma-Ata», «Grand park», «Almaty moll», «Dostyq plaza», «Mega park», «Mega Alma-Ata», «Atakentmoll», «Mart», «Sılkýeı sıtı», «Alataý», «ADK), sondaı-aq 61 saýda ortalyǵy jumys isteı bastady.

14 qańtardan bastap «Esentaımoll» saýda oıyn-saýyq ortalyǵy jumysyn bastaýǵa daıyn. «Forým» saýda oıyn-saýyq ortalyǵy qaladaǵy jaǵdaı turaqtanǵannan keıin ashylady.

Tótenshe jaǵdaıdyń sońyna deıin 9.00-den 18.00-ge deıingi rejımde 2 myńǵa jýyq qoǵamdyq tamaqtaný nysandary ashyldy, onda spırtti ishimdik satylmaıdy. Búgin, 13 qańtar kúni 500-ge jýyq qoǵamdyq tamaqtaný nysandaryn ashý josparlanýda. Qazirgi ýaqytta 39 qoǵamdyq tamaqtaný obektilerine zalal keltirilgeni anyqtaldy.

Búginde qaladaǵy 120 kásiporynnyń 91-i jumys isteıdi. Qalǵandary 14-19 qańtar aralyǵynda iske qosýdy josparlap otyr.