Almatyda ruqsat etilmegen mıtıngke qatysqan ekobelsendi Saltanat Táshimova qamaýǵa alyndy

ALMATY. QazAqparat- Almaty ákimshilik quqyq buzýshylyqtar boıynsha mamandandyrylǵan aýdanaralyq soty belsendi Saltanat Táshimovany ruqsat etilmegen mıtıngke qatysqany úshin 15 táýlikke qamaý týraly sheshim shyǵardy, dep habarlaıdy QazAqparat tilshisi.

6 maýsym kúni Almaty qalasynyń ákimshilik sotyna mıtıngke zańsyz qatysý faktisi boıynsha Saltanat Táshimovaǵa qatysty materıal tústi (ÁQBtK-niń 488-babynyń 6-bóligi).

Saltanat Táshimovaǵa Bostandyq aýdanyndaǵy «Mınına» skverinde birqatar turǵyn úı kesheniniń turǵyndarymen birge 9 sáýirde bılikpen kelisilmegen mıtıngige qatysty degen aıyp taǵyldy.

Mıtıng kezinde turǵyndar saıabaq mańynda 12 qabatty turǵyn úıdiń salynbaýyn talap etken.

Prokýror sottan Saltanat Táshimovany ÁQBtK-niń 488-babynyń 6-bóliginde kózdelgen ákimshilik quqyq buzýshylyqty jasaǵany úshin kináli dep tanyp, 15 táýlikke ákimshilik qamaqqa alý túrindegi ákimshilik jaza qoldanýdy surady.

«15 táýlikke ákimshilik qamaqqa alýdy taǵaıyndaý bóliginde, ákimshilik jazanyń túri men mólsherin anyqtaý kezinde sot quqyq buzýshylyqtyń sıpatyn, quqyq buzýshylyqty qasaqana jasaý faktisin eskergenin atap ótken jón. Quqyq qorǵaý organdary, jergilikti atqarýshy organ ókilderiniń quqyq buzýshylyqty toqtatý týraly talappen zańdy túsindirýlerine qaramastan, quqyqqa qaıshy minez-qulyqtyń jalǵasýy anyqtaldy»,- dep habarlady Almaty qalasynyń ákimshilik quqyq buzýshylyq isteri jónindegi mamandandyrylǵan aýdanaralyq sotynan.

Aıta keteıik, sot otyrysynda ekobelsendi Saltanat Táshimova óz kinásin moıyndaǵan joq.

«Qazirgi ýaqytta sot aktisi zańdy kúshine engen joq. Sot sheshimine qatysty apellıatsııalyq sotqa shaǵym túsirýge quqyly»,- dep atap ótti vedomstvadan.