Almatyda «Recommended by Universiade -2017» seriktestik baǵdarlamasy tanystyryldy
Atalǵan baǵdarlama aıasynda Almaty qalasy aýmaǵyndaǵy qonaq úı, hostel, qoǵamdyq tamaqtaný oryndary «Recommended by Universiade-2017» belgisimen Ýnıversıadaǵa qatysýǵa irikteý komıssııasynyń qaraýyna óte alady.
«Ýnıversıada - Qazaqstan tarıhyndaǵy iri sport sharasy. 5 000 sportshy, jattyqtyrýshy, mamandar men qurmetti qonaqtardy kútip otyrmyz. Ýnıversıada kezinde 30 myńnan astam týrısti qabyldamaqpyz. Biz Týrızm basqarmasymen «Recommended by Universiade - 2017» baǵdarlamasyn júzege asyrýǵa kiristik», - dedi «Ýnıversıada 2017» dırektsııasynyń dırektory Naıl Nýrov baǵdarlamanyń tanystyrylymynda.
Óz sózinde Naıl Nýrov atalǵan baǵdarlamanyń maqsaty qysqy ýnıversıada kezinde de Almaty qalasyna kelgen týrısterge jaıly jaǵdaı jasaýǵa baǵyttalǵan salalardyń sapasyn arttyrý ekenin naqtylaı tústi.
«Almaty jylyna 4 mln týrısti qabyldaýǵa qaýqarly. Qaziri jaǵdaıda biz saıahatshylarǵa asa tanyla qoıǵan joqpyz, degenmen Ýnıversıadadan keıin jaǵdaı ózgeredi dep oılaımyn. Aıta keteıik, jasalǵan saraptamalarǵa súıensek, qyzmet kórsetý sapasy jaǵynan biz kórshi aımaqtardaǵy qalalardan qalyp kelemiz. Bizdiń mindet: «áýejaıdan áýejaıǵa deıin» sapasyn júıeleý. Óıtkeni, biz qonaq úı men qoǵamdyq tamaqtaný salalarynda sapaly servısti qurýǵa kiristik. Bul birinshi qadam. Osydan keıin biz áýejaıda, saýda ortalyqtarynda qyzmet kórsetý talaptaryn ázirleımiz. Týrkompanııalarǵa monıtorıng jasap otyramyz», - dedi Naıl Nýrov.
«Recommended by Universiade-2017» baǵdarlamasy resmı túrde 7 qarashadan jumysyn bastaıdy. Baǵdarlamanyń alǵashqy nátıjesi qarasha aıynyń sońynda belgili bolmaq. Jeltoqsan aıynyń sońynda baǵdarlamaǵa qatysýshylar týraly qaǵaz betindegi jáne ınteraktıvti túrdegi karta ázirleý josparlanǵan.
Ýnıversıada aıaqtalǵannan keıin «Almaty Quality» sapa belgisin qurý belgilenip otyr.
