Almatyda Ortalyq Azııadaǵy kólik jáne tranzıt máselesi boıynsha forým ótti
Forýmǵa Ózbekstan, Tájikstan, Qyrǵyz eli, Túrkimenstan elderinen 70-ke jýyq memlekettik, jeke sektor, temir jol jáne logıstıkalyq kompanııalardan mamandar qatysyp, Ortalyq Azııadaǵy transport dáliziniń basty máselelerin talqylady.
Jıynda sóz alǵan USAID/ Ortalyq Azııa boıynsha ekonomıkalyq damý bóliminiń dırektory Endrıý Sıgars transport dálizin jaqsartý aımaqtyq ıntegratsııany barynsha tereńdetinin jáne álemdik naryqqa jol ashyp qana qoımaı, ekonomıkalyq-saýda baılanysyn nyǵaıtatynyn aıtty.
«Qazirgi ýaqytta, mysaly, bir kásipker ár shekarada jańa qaǵaz toltyrýǵa májbúr bolyp otyr. Muny sheshýdiń joly retinde shekaradaǵa zańdardy sáıkestendirmesek te barynsha uqsatyp jeńildetý jaǵyn qarastyrý qajet. Osyndaı jıyndar atalǵan máselelerdi sheshýge septesedi dep oılaımyn. Buryn Keńes úkimeti kezinde Ortalyq Azııa elderi arasynda saýda-sattyq máselesinde aıtarlyqtaı kedergi bolmady. Qazirgi ýaqytta búgingideı dıalogtar kerek. Bizdiń oıymyzsha, saýda-sattyq salasynda ár memleket qujatty retteýdi jeńildetetin qyzmet kórsetý «terezesin» kóbeıtse, barynsha jeńil bolmaq», - dedi Endrıý Sıgars «QazAqparat» tilshisine bergen suhbatynda.
Forýmǵa moderatorlyq etken Qazaqstannyń Qurmetti temirjolshysy, M. Tynyshpaev atyndaǵy Qazaq kólik jáne kommýnıkatsııalar akademııasynyń ǵylymı qyzmetkeri Berik Bólekbaev Ortalyq Azııadaǵy seriktestik jáne logıstıkalyq transport máselesin sheshý, qujattardy sáıkestendirý taqyryby ózekti bolyp otyrǵanyn aıtty.
«QazAqparat» tilshisine bergen suhbatynda búgingi jıynda júkterdi tasymaldaý jáne ony saqtandyrý, qujattardy resimdeý úderisin jedeldetý, sertıfıkattaý taqyryptary barynsha talqyǵa salynǵanyn aıtty.
«Shekaralyq pýnkterde qordalanǵan máseleler kóp ekenin belgili. Ortalyq Azııa elderinde ınfraqurylym jaqsy damymaı jatyr. Qazaqstan bul salada alǵa jyljyp keledi, alaıda Tájikstan, Qyrǵyz elinde tas joldardy salýdy qarjylandyrýda qıyndyqtar bar. Ortaq baılanys joq, sondyqtan osy kedergilerdi joıýda bizge seriktestik qajet. Qazaqstan sońǵy 10 jyldyń ishinde aıtarlyqtaı tabystarǵa jetti. Іshki naryqta damý bar, temir jol jelileri tartylyp, Keńes Úkimetinen keıin baılanyspaı qalǵan shıkizat núkteleri qosyldy. 2000 shaqyrymǵa jýyq temir jol tartyldy. Mańǵystaý oblysy Qaraqııa aýdanyndaǵy Quryq portyna temir jol jelisi tartyldy. «Nurly jol» baǵdarlamasy óz ýaqytymen júzege asyrylyp otyr. Logıstıkalyq ortalyqtar salynyp jatyr. «Altyn kól» ekinshi halyqaralyq stansasyn damytý boıynsha jumystar júrýde. Shekaralyq hab bolmaq, onda avtokólik, temir jol tasymaly júzege asyrylyp, táýligine 1000-ǵa deıin júk kóligi ótkiziletin bolady. Bul - iri keshen. «Altyn kól» arqyly 2017-2018 jyldary 15-20 mln tonna júk ótedi dep josparlanǵan. Sonymen qatar, bilesizder, Qazaqstan osydan eki jyl buryn Túrkimenstan arqyly Parsy shyǵanaǵyna shyǵatyn jol saldy. Bul da úlken jumys», - dedi ol.
