Almatyda Nursultandar qaıyrymdylyq chellendjin bastady

ALMATY. QazAqparat - Qazaqstan respýblıkasynyń Tuńǵysh Prezıdenti kúnine oraı Nur Otan partııasynyń Nursultan esimdi músheleriniń usynysymen partııanyń Almaty qalalyq fılıalynyń qoldaýymen «Armandar oryndalady» qaıyrymdylyq aktsııasy uıymdastyryldy, dep habarlaıdy QazAqparat qala ákimdigine silteme jasap.

«Nursultan esimdi 100 azamat arnaıy brendtelgen avtobýspen «Aqsaı» respýblıkalyq klınıkalyq balalar aýrýhanasyna baryp, ondaǵy emdelip jatqan 100 balany merekemen quttyqtap, olarǵa ózderi qalaǵan baǵaly syılyqtaryn tabys etti. Bul medıtsınalyq mekemede kúrdeli dıagnozy bar balalar em qabyldaıdy. Balalardyń barlyq tilekteri aldyn ala jınalǵan bolatyn», delingen ákimdiktiń Telegram-daǵy paraqshasynda.

Shara sońynda Tuńǵysh Prezıdent saıabaǵynda aktsııaǵa qatysýshylar qaıyrymdylyq chellendjin bastap, qazaqstandyqtarǵa osy is-sharany qoldap, naýqas balalarǵa kómek kórsetý týraly úndeý jasady. Aýyr dertke shaldyqqan balalarǵa kómek kórsetý úshin osy aktsııaǵa qatysýǵa bolady. Anyqtama úshin Nur Otan partııasy Almaty qalalyq fılıalyna habarlasý kerek.