Almatyda «Narkostop» esirtkige qarsy aktsııasy bastaldy

ALMATY. QazAqparat- Almaty qalasy Jastar saıasatyn damytý memlekettik qory, qalalyq PD-niń esirtki qylmysyna qarsy is-qımyl basqarmasymen birlesip, qalalyq «Narkostop» esirtkige qarsy aktsııasyn bastady, dep habarlaıdy QazAqparat tilshisi.

«Narkostop» halyqtyń esirtkige qarsy ımmýnıtetin qalyptastyrýǵa jáne nashaqorlyqtyń aldyn alýǵa baǵyttalǵan jalpyqalalyq is-shara.

Aktsııanyń maqsaty – nashaqorlyqqa qarsy, qoǵamǵa keńes berý formatynda áleýmettik is-sharalar ótkizý, esirtki taratý týraly jarnamalyq jazýlardan ǵımarat qabyrǵalaryn tazartyp, jasóspirimder men jastardy qoǵamdyq belsendilikke tartý.

Aktsııa aıasynda turǵyn úıler, garajdar, keńse ǵımarattar qabyrǵalaryndaǵy esirtki taratýdy nasıhattaıtyn jáne túrli saıttar jazylǵan trafaret pen graffıtter syrlanyp joıyldy.

Sondaı-aq, turǵyndarǵa esirtki qylmystary, aǵzaǵa zııandylyǵy týraly jáne salaýatty ómir saltyn nasıhattaıtyn aqparattyq paraqshalar taratyp, túsindirme jumystary júrgizildi.

Aktsııa Almaty qalasynyń barlyq 8 aýdanynda keń kóleminde ótip jatyr.