Almatyda múmkindigi shekteýli adamdarǵa qandaı kómek kórsetiledi

ALMATY. QazAqparat - Almatyda 17 myńǵa jýyq múmkindigi shekteýli jan qozǵalys qurylǵylary – sýrdo jáne tıflo-tehnıkalarmen qamtamasyz etildi. Bul týraly qalalyq áleýmettik ál-aýqat basqarmasynyń basshysy Nazıra Toǵyzbaeva málim etti, dep habarlaıdy QazAqparat tilshisi.

Basqarma basshysy keltirgen derekterge súıensek, Almatyda 53,7 myńnan astam múmkindigi shekteýli adam turady. Ońaltýdyń jeke baǵdarlamasy boıynsha olardyń barlyǵy ońaltý men áleýmettik qyzmetterge tehnıkalyq quraldarmen aqysyz qamtamasyz etilgen. Bul maqsattarǵa 5,6 mlrd teńge bólingen.

«Bıyl áleýmettik qyzmetter portaly engizildi, onda múgedekter respýblıka boıynsha jetkizýshilerden qajetti taýarlar men qyzmetter túrin óz betinshe tańdaı alady. Múgedekterdiń tilekterine sáıkes qymbat turatyn taýarlardy tańdaǵanda qosymsha tólem jasaý fýnktsııasy bar tehnıkalyq quraldardyń belgilengen qunyn óteý mehanızmi qarastyrylǵan. Jyl basynan beri 16 800 múgedekke ońaltý, qozǵalys quraldary, tıflo-sýrdo tehnıkalyq quraldar men gıgıenalyq quraldar berildi»,- dedi Nazıra Toǵyzbaeva.

Sonymen qatar, 5 myń múgedek ońaltýdan ótti. Olarǵa ym-ıshara tili mamandary men jeke kómekshiler kómek kórsetti. Sonymen qatar, sanatorılerge emdelýge jiberildi.

«Qozǵalýy qıyn múgedekter men múgedek balalarǵa «Invataksı» kóliginiń aqysyz qyzmeti usynylady. Bul qyzmetti aı saıyn 1 500 múgedek pen 357 múmkindigi shekteýli bala paıdalanady. Aıta ketsek, Almatyda «Ońaı» júıesi ornatylǵan 39 «Invataksı» avtokóligi bar»,- dedi spıker.

Sonymen qatar, ol qalada múgedekterdiń áleýmettik ınfraqurylymǵa qoljetimdiligin qamtamasyz etý boıynsha, onyń ishinde nysandardy sertıfıkattaý men beıimdeý jumystary júrgizilip jatqanyn basa aıtty. 2021 jyly 180 mekeme sertıfıkattaldy, 150 nysan beıimdeldi.

Áleýmettik ál-aýqat basqarmasynyń basshysy múmkindigi shekteýli jandardy qoldaý úshin qurylǵan «TenQogam» áleýmettik qoldaý ortalyǵy týraly da aıtty.

Ortalyq mamandary quqyqtyq, psıhologııalyq qyzmet kórsetedi, sonymen qatar áleýmettik, pedagogıkalyq jáne tárbıelik máselelerdi sheshýge kómektesedi, trenıngter men vebınarlar ótkizedi.

«Múgedektikke baılanysty qorqynysh pen belgisizdikti joıýǵa baǵyttalǵan «Táýelsiz ómir mektebi» jobasyn iske asyrý jalǵasýda. Bul mektepte olar ózin-ózi baǵalaýdy arttyrýǵa jáne qajetti daǵdylardy qalyptastyrýǵa kómektesedi. Bıyl erekshe qajettilikteri bar 80 azamat 6 jattyqtyrýshymen bir aptalyq kýrstan ótti. Kýrstar aıaqtalǵannan keıin keńse bazasynda 21 kúndik sheberlik sabaqtary jalǵasatyn bolady», - dedi Nazıra Toǵyzbaeva.