Almatyda monsha kesheni otqa orandy

ALMATY. QazAqparat - Almatyda jumys istemeı turǵan monsha kesheni órtendi, dep habarlaıdy QazAqparat tilshisi.

Otqa oranǵan monsha kesheniniń vıdeosy áleýmettik jelige shyqty.

Vıdeoda monsha kesheniniń qurylysy aıaqtalmaǵany, onyń «Nurly taý» shaǵynaýdanynda ornalasqany aıtylǵan.

Almaty qalalyq tótenshe jaǵdaılar departamenti órt sóndirýshiler 2 qyrkúıek kúni saǵat 23:13-te joǵary dabyl belgisimen Bostandyq aýdany «Nurly taý» shaǵynaýdany, Nurtazın, 1 mekenjaıyna shyqqanyn habarlady.

Oqıǵa ornyna jetkende monsha kesheniniń 600 sharshy metr aýmaqta salynyp jatqan eki qabatty ǵımaratynan ot shyqqany anyqtaldy. Órtengen ǵımarat qulaı bastaǵan.

Órttiń tez taralýyna ǵımarattyń aǵashtan jasalǵany sebep boldy. Sondaı-aq órttiń eki turǵyn úıge taralý qaýpi týdy.

«Oqıǵa ornynda shtab pen sóndiriletin eki ýchaske quryldy. Órt sóndirý jáne kórshiles úılerdi órtten qorǵaý úshin oqpandar engizildi. Órt sóndirýshiler qaýipsizdik erejesine sáıkes jumys istedi. RES-5 elektrıkteri nysandy toqtan ajyratty. Órt bolǵan jer «sýy az» aýmaq bolǵan soń tilsiz jaýmen kúres qıynǵa soqty. Alaıda sý úzdiksiz berildi. Sonymen qatar, «Almaty Sý» mekemesiniń tehnıkasy jumyldyryldy», - dep habarlady Almaty qalalyq TJD.

Jalyndy aýyzdyqtaýǵa 66 adam, 22 tehnıka jumyldyryldy.

Órt saǵat 00:27-de oqshaýlanyp, 01:20-da sóndirildi. Zardap shekkender men qaza tapqandar bolǵan joq.

Monsha kesheniniń aıtarlyqtaı bóligi órtten aman qaldy.

Polıtsııa qyzmetkerleri órt bolǵan jerdi qorshaýǵa alyp, qoǵamdyq tártipti qamtamasyz etti.