Almatyda medıtsına kadrlaryn oqytýǵa 140 grant bólindi

ALMATY. QazAqparat – Kadr tapshylyǵyn tómendetý jáne mamandardyń áleýetin arttyrý úshin qalalyq baǵdarlama aıasynda jyl saıyn joǵary, joǵary oqý ornynan keıingi bilimi bar kadrlardy daıarlaýǵa qarjy bólinedi, dep habarlaıdy Qazaqparat tilshisi.

Almaty ákimdiginiń málimetinshe, 2021 jyldan bastap qalada suranysqa ıe klınıkalyq mamandyqtar boıynsha rezıdentýrada oqýǵa qabyldaý jergilikti bıýdjet esebinen júrgizilip keledi. 2021-2023 jyldar aralyǵynda rezıdentterdi daıarlaýǵa arnalǵan 380 bilim berý granty bólindi (2021 jyly – 120, 2022 jyly – 120, 2023 jyly – 140). 2024 jylǵa taǵy 140 qalalyq bilim grantyn bólý kózdelgen.

Rezıdentýranyń qalalyq bilim berý tapsyrysyn bólý kezinde Almaty qalasy qoǵamdyq densaýlyq saqtaý basqarmasynyń vedomstvolyq baǵynysty medıtsınalyq uıymdarynyń ótinimderine sáıkes qalanyń qajettiligi eskeriledi.

Bıyl shilde aıyndaǵy jaǵdaı boıynsha dárigerlerdiń tapshylyǵy beıindegi mamandar esebinen 162 shtattyq birlikke jetti, atap aıtqanda akýsher-gınekologtar, anestezıologtar-reanımatologtar, allergologtar, kardıologtar, nevropatologtar, ınfektsıonıster, endokrınologtar jáne t.b. tapshy.

«Beıindi dárigerlerdiń tapshylyǵy mamandandyrylǵan medıtsınalyq kómekke degen qajettiliktiń artýyna baılanysty konsýltatsııalyq-dıagnostıkalyq qyzmetterdiń kóbeıýimen baılanysty, buǵan bala týý kórsetkishiniń ósýi, salmaǵy az bolyp týǵan balalardy kútýdiń joǵary paıyzy jáne ishki kóshi-qon sebep. Buǵan qosa, qala ákimdigi orta medıtsınalyq mamandardy daıarlaý boıynsha aýqymdy jumys júrgizip otyr. Mysaly, bıyl maqsattarǵa 1 mlrd 464 mln teńge somasyna 1113 grant bólindi, byltyr bul soma shamamen 886 mln teńge (1032 grant) bolǵan»,- dep habarlady ákimdikten.

Almaty qalasynda orta býyn medbıkelerin 13 medıtsınalyq kolledj daıyndaıdy, onyń 1-i - memlekettik, 12-i - jekemenshik. Mamandar 8 mamandyq jáne 10 biliktilik boıynsha daıarlanady.

Jyl saıyn 2 500-den astam orta medıtsınalyq qyzmetker daıarlanady, onyń 1700-den astamy «Meıirbıke isi» mamandyǵy boıynsha oqıdy.

Aıta keteıik, úsh deńgeıli júıe boıynsha oqytýdyń arnaıy baǵdarlamasy jyl saıyn 3 340 maman men 70 menedjerdi daıyndaıdy (2023 jyly bul maqsatqa jergilikti bıýdjetten 1,9 mlrd.teńge bólindi).

Ári onyń aıasynda joǵary, joǵary oqý ornynan keıingi bilimi bar 140 maman daıarlanady.