Almatyda maıdanger aqyn Leonıd Gırshtyń tańdamaly jınaǵy jaryq kórdi
Sharaǵa qatysqan Almaty qalasy ákimi orynbasary Arman Qyryqbaev jıynda sóz alyp aqyndy kezekti jınaǵynyń jaryqqa shyǵýymen quttyqtady.
« Búgingi jınalysymyzda bir sımvolıkalyq mán bar sııaqty. Nege deseńiz, biz osy arqyly aldyńǵy býyn aǵalardy qasterlep, olardyń atqarǵan jumysyn áspettep keıingi jastarǵa úlgi kórsetemiz dep oılaımyn. Sonaý qandy kúnderderge oralyp, azapty sátterdi eske alyp, ony qaǵazǵa túsiripsiz»,-dedi ol.
Jazýshy, qoǵam qaıratkeri Oljas Súleımenov te sharaǵa qonaq bolyp, aqyn qýanyshyna ortaqtasty.
«Sizdiń kitabyńyzdy qolyma alǵanyma óte qýanyshtymyn. Osy jasyńyzda kezekti kitabyńyzdy shyǵaryp jatqanyńyzǵa rızamyn. Ardager, polkovnık, maıdanda ot keshken adamnyń búginde jany shyǵarmashylyq energııaǵa toly. Joldas polkovnık, kezekti jeńisińiz qutty bolsyn!»,-dedi Oljas Súleımenov.
Almaty qalasynyń qurmetti azamaty, ardager Leonıd Gırsh 94 jasta. Ómiriniń jartysyn áskerı qyzmetke arnaǵan ol maıdannan oralǵan soń shyǵarmashylyqqa den qoıady. Zulmat zamannyń kórinisteri baıandalǵan birneshe jınaǵyn jaryqqa shyǵarady. «Blızko k serdtsý», «Naedıne s pamıatıý», «Prohladnye travy», «Skvoz plamıa voıny» kitaptarynyń avtory soǵys taqyrybynda ǵana qalam terbeıtinin basa aıtty.
«Meniń birneshe jınaǵym jaryq kórdi. Basqa taqyrypty qozǵamaımyn. Tek soǵys týraly jazamyn. Sebebi bul meniń kóz aldymnan ótkerip, bastan keshkenim. «Soǵys pen beıbitshilik týraly óleńder» atty kitabym tańdaýly degen jyrlarymnan turady. Jastarǵa óleńderim arqyly soǵystyń beınesin bere aldym dep oılaımyn, endigi jaýap oqyrmannan»,-dedi ardager aqyn Leonıd Gırsh.
Araılym Joldasbaı
