Almatyda latyn grafıkasynda basylǵan alǵashqy kitaptyń tusaýy kesildi
Búgin Almatydaǵy «Knıjnyı gorod» dúkeninde Lıýbov Govorýhınanyń latyn álipbıinde basylyp shyqqan «Mahabbat qyzyq jas da'y'ren» (Mahabbat qyzyq jas dáýren) kitabynyń tusaýy kesildi. 1 000 tırajben jaryq kórip otyrǵan kitap orys tilinde jazylǵan, sosyn qazaq tiline aýdarylǵan.
«Qazaqstandaǵy latyn álipbıi reformasyn qýana qoldadyq. Sondyqtan, adamzattyń barlyǵyna ortaq mahabbat tilindegi hıkaıalardy nege barlyǵyna ortaq, tanys árippen basyp kórmeske dep oıladyq ta osy bastamany qolǵa aldyq. Latyn álipbıin jastar qoldady. Sondyqtan, kitapty jastar oqıdy dep senemin», - dedi ıdeıa avtory, kitapty shyǵarýshy Janna Isıngarına.
Kitap avtory Lıýbov Govorýhına buǵan deıin qysqa hıkaıattar men áńgimeler jazyp júrgenimen kitap retinde basylyp otyrǵan alǵashqy eńbegi ekenin aıtty.
«Bul birinshi kitabym. Birinshi, áńgimelerdi latyn árpimen basyp kórdik. Oqyrman qyzyǵýshylyq tanytqan soń, jınaqtap, kitap etip shyǵaryp otyrmyz. Bul - bastama. Eger oqyrmanǵa qyzyqty bolsa, ary qaraı jalǵasyn tabýy múmkin. Kitap orys tilinde jazylyp, qazaq tiline aýdaryldy. Kitapta mahabbat hıkaıalary baıandalady. Onda temirjolshynyń basynan ótkeni týraly áńgime bar. Onda «Qorǵas», Jezqazǵannan Qazaqstannyń batysyna jol tartylǵan memlekettik iri jobada qyzmet etken temirjolshynyń saparda ómirlik jarymen tabysýy týraly hıkaıa sýrettelgen. Jalpy, kitap jolaýshylarǵa arnalǵan dese bolady», - dedi avtor.
Kitapty tanystyrýǵa Astanadan arnaıy kelgen Murat Ábenov orys tildi avtordyń qazaq tilinde latyn álipbıimen kitap shyǵarýyna erekshe mán berý qajettigin aıtty.
«Shet elde Qazaqstannyń memelkettik tiliniń latyn álipbıine kóshýine synı kózben qaraıtyndar bar. Al elimizde qoǵamnyń barlyq satysynda bul bastamaǵa qoldaý tanytqanyn osydan kórýge bolady. Latyn álipbıine qatysty áli de talqylaýlar júrip jatyr. Sondyqtan, osyndaı kitaptar shyqqany jaqsy. Sosyn, bul memlekettiń qarjysyna shyǵyp jatqan joq. Bul memlekettik tildi nasıhattaýǵa da tıimdi. Keıin ǵylymı kitaptar shyǵa jatar. Mahabbat taqyryby adamnyń bárine ortaq sezim. Sondyqtan, kúrdeli bolmas», - dedi Murat Ábenov.
Atalǵan kitap Almatynyń áýejaıy men temir jol vokzalyndaǵy dúkenderde satyla bastaǵan. Qańtar aıynan bastap, Astana qalasynda jáne «Meloman» dúkender jelisinde satylymǵa shyǵady. Kitaptyń quny shamamen - 1 500 teńge.