Almatyda qurylysshylardyń kásibı merekesi atalyp ótilýde

Y. Tamyzdyń 6-sy. QazAqparat /Ádilet Musahaev/ - Osy jyly Almatyda densaýlyq saýyqtyrý oryndary men mektep, balabaqshalar sııaqty úlken 5 nysannyń qurylysy júrgizilip jatyr. Onyń bireýiniń qurylysy aıaqtaldy. Sonymen qatar qurylysshylarymyzdyń eren eńbeginiń arqasynda kóptegen qurylys nysandarynyń jumysy qarqyndy júrip jatyr. Bul jaıynda búgin Almaty qalasy ákiminiń orynbasary Vıktor Doljenkov qurylysshylardy kásibı merekesimen quttyqtaý barysynda aıtty,

dep habarlaıdy QazAqparat.

V. Doljenkov qurylysshylardy kásibı merekelerimen quttyqtaı kele osy ýaqytqa deıin olardyń atqarǵan eńbekterine toqtalyp, qalamyzdyń kórkeıýine qosqan úlesteri úshin rızashylyǵyn bildirdi.

«Qazir qalamyzda metro týnnelderi men basqada qurylys nysandarynyń jumysy qyzý júrip jatyr. Jylý berý, kommýnaldy qubyrlardy aýystyrýda da kóptegen ister atqarylyp jatyr. Osy ýaqytqa deıin 400 myńǵa jýyq sharshy metrli turǵyn úı salyp ótkizsek, tamyz aıynyń sońyna qaraı taǵy 100 myńyn ótkizip jyl sońyna qaraı mıllıonǵa jetkizemiz dep oılaımyn», dep atap ótti óz sózinde Vıktor Doljenkov.

Sonymen qatar ol daǵdarysqa baılanysty jumysy toqtap qalǵan qurylys nysandary men úleskerlerdiń múddesin qorǵaý maqsatynda el qazynasynan 63 mıllıard qarjy bólingenin jetkizdi.

Sondaı-aq ol qurylys salasynda joǵary dárejeli kórsetkishterge qol jetkizip, aıanbaı eńbek etken qurylys kompanııalarynyń basshylaryn qala ákiminiń atynan quttyqtap, «Qazaqstannyń qurmetti qurylysshysy» tós belgisin tabys etti.