Almatyda Qurban aıt kezinde qandaı is-sharalarǵa tyıym salynady

ALMATY. QazAqparat – Almaty qalasy Bas sanıtarlyq dárigeri Jandarbek Bekshın Qurban aıt merekesine qatysty qaýly shyǵardy, dep habarlaıdy QazAqparat tilshisi.

Qaýlyǵa sáıkes Qurban aıt merekesin toılaý kezeńinde 2020 jylǵy 31 shildeden 2 tamyz aralyǵynda tómendegi is-áreketke tyıym salynady:

1) menshik nysanyna qaramastan barlyq uıymdarda, sondaı-aq jeke menshik úı ıelikterinde jáne medresede adamdar kóp jınalatyn is-sharalar ótkizýge;

2) Almaty qalasynyń aýmaǵynda mal soıýdy uıymdastyrýǵa jáne ótkizýge, avtokólikterde jáne jeke úı ıelikterinde mal satýǵa tyıym salynady.

31 shildeden 2 tamyz aralyǵynda Almaty qalasynyń ortalyq meshitimen belgilegen onlaın rejıminde qurbandyq shalýdy júzege asyratyndardy qospaǵanda, mal soıý tsehtary men mal satý bazarynyń jumysyn toqtatylady.

Sondaı-aq, Almaty qalasynyń kire beristerinde, qurbandyq shalýdy onlaın rejıminde júzege asyrýǵa arnalǵandardy qospaǵanda, qala aýmaǵyna janýarlardy ákelmeýdi boldyrmaý úshin posttar ashylady.

Qurbandyq shalýǵa onlaın rejıminde Qurban2020.kz saıtyna ótinim berý arqyly ruqsat beriledi. «Qurban aıt» merekesin uıymdastyrý máselelerin halyqqa túsindirý úshin Call-ortalyqtyń jumysyn uıymdastyrý qolǵa alynǵan.

Qurban merekesine atsalysqan adamdardy jeke qorǵaný quraldarymen qamtamasyz ete otyryp, muqtaj adamdarǵa tez buzylatyn ónimderdi (qurban bolǵan janýarlardyń eti) tasymaldaý jáne saqtaý jónindegi sanıtarlyq-epıdemıologııalyq erejeler talaptarynyń saqtalýyn qamtamasyz etý kózdelgen.

Qaýlynyń oryndalýyn baqylaý Almaty qalasynyń polıtsııa departamentine, aýdandyq ákimdikterge jáne QR AShM Veterınarııalyq baqylaý jáne qadaǵalaý komıtetiniń aýmaqtyq ınspektsııasyna júkteldi.