Almatyda QR Tuńǵysh Prezıdenti – Elbasy zaly ashyldy
Bul zal 1 jeltoqsan — QR Tuńǵysh prezıdenti kúnine oraı ashylyp otyr.
Sharaǵa «QR Tuńǵysh Prezıdenti - Elbasy kitaphanasynyń» dırektory Ámirhan Rahymjanov, Ál-Farabı atyndaǵy Qazaq ulttyq ýnıversıtetiniń rektory, akademık Ǵalym Mutanov, ýnıversıtet ǵalymdary, qoǵam jáne BAQ ókilderi qatysty.
Atalǵan zal bilim ortalyǵy bolyp esepteledi, onda Nursultan Nazarbaev el basqarǵan kezdegi táýelsiz elimizdiń qurylý tarıhy men nyǵaıýy jolyndaǵy materıaldar jınaqtalǵan.
«QazUÝ osymen tórtinshi jyl Elbasy kitaphanasymen tyǵyz baılanysta jumys istep jatyr. Byltyr stýdenttermen kezdestik, onyń aldynda «Elbasy modeli» atty halyqaralyq konferentsııa ótkizdik. Búgingi kezdesýimiz de sol úlken jobanyń jalǵasy. Bizdiń kitaphanada sońǵy jyldary kóptegen jańa kitaptar shyǵyp jatyr, búgin solardyń ishinen 100 kitapty osy zalǵa tapsyrýǵa alyp keldik. Óıtkeni bolashaq jastarymyz elimizdiń tarıhyn bilip ósýi kerek. Olardyń oı-órisin osy kitap, bilim arqyly keńeıtemiz dep oılaımyz. Ákelgen kitaptardyń ishinde «Tuńǵysh Prezıdenttiń álemniń jetekshi ýnıversıtetterinde oqyǵan dárisi», «Nazarbaev modeli» atty kitaptar bar. Bular jaqynda ǵana jaryq kórgen, ıaǵnı sııasy áli keýip úlgermegen kitaptar», - dedi Ámirhan Rahymjanov.
Rektordyń aıtýynsha, bul zal aldaǵy ýaqytta ǵylymı-tájirıbelik konferentsııalar men semınarlar ótkizetin, sarapshylar qaýymdastyǵynyń jáne bilim, mádenıet salasy mamandarynyń kezdesý alańyna aınalady.
«Tuńǵysh Prezıdent kitaphanasynyń dırektoryna alǵys aıtqym keledi. Professor Mahmýd Bazarqululynyń basshylyǵymen kóptegen ister jasalyp jatqanyn bilemiz. Búgingi kúni bizdiń kitaphana 100 jańa kitappen tolyqty. Olardyń barlyǵy óte qundy. Osy zalda bizdiń oqytýshylar, ǵalymdar men stýdenter Ult Kóshbasshysy Elbasy týraly barlyq materıaldy taba alady», - dep atap ótti ýnıversıtet rektory, akademık Ǵalym Mutanov.
