Almatyda koronavırýsty dıagnostıkalaý úshin jasandy ıntellekt qoldanylady
Bul jóninde óńirlik kommýnıkatsııalar qyzmetiniń alańynda ótken onlaın brıfıngte Tsıfrlandyrý basqarmasynyń basshysy Baıan Qońyrbaev, «iMedHub» jobasynyń jetekshisi Renata Ahmad málimdedi, dep habarlaıdy QazAqparat tilshisi.
2020 jyldyń sáýirinde Almatyda Forus Data kompanııasy medıtsınalyq keskinderdi óńdeýge arnalǵan quny shamamen 30 mln teńge bolatyn PACS serverin jasady. Ol Almaty qalasynyń Data ortalyǵynda ornalasqan.
PACS júıesi (sýretti muraǵattaý jáne baılanys júıesi) kompıýterlik jelilerdi, serverlerdi, baǵdarlamalyq qamtamasyz etýdi júzege asyrady jáne sandyq radıologııalyq keskinderdi saqtaýǵa, muraǵatqa saqtaýǵa múmkindik beredi.
Jasandy ıntelektini qoldaný arqyly ókpe aýrýyn dıagnostıkalaý úshin PACS serverine qosý jumysy Almatydaǵy birqatar aýrýhanalarda júzege asyryldy:
- I. Jekenov atyndaǵy qalalyq klınıkalyq juqpaly aýrýlar aýrýhanasy;
- Qazaq onkologııa jáne radıologııa ǵylymı-zertteý ınstıtýty;
- Almaty qalasy Ulttyq ftızıopýlmonologııa ǵylymı ortalyǵy;
- Almaty qalalyq balalar klınıkalyq juqpaly aýrýlar aýrýhanasy;
- Modýldik juqpaly aýrýlar aýrýhanasy;
PACS jáne qyzmetterdi qosý jumysy kelesi mekemelerde júrgizilýde:
- Almaty qalalyq Jedel medıtsınalyq kómek kórsetý aýrýhanasy;
- Almaty qalalyq onkologııa ortalyǵy;
- № 12 qalalyq klınıkalyq aýrýhana.
PACS - qosylǵan barlyq aýrýhanaǵa sandyq medıtsınalyq keskinderge qol jetkizý múmkindigin beredi. Naýqasty bir medıtsınalyq uıymnan ekinshisine jibergen kezde plenka nemese qaǵaz keskinderin qoldanýdyń qajeti joq. Sonymen qatar aýrý dınamıkasyn baqylaý múmkindigi beriledi.
Dárigerler jasandy ıntelektini qosymsha pikir retinde qoldanady. Bul olardyń jumysyn jeńildetýge, aýrýdyń naqty dıagostıkasyn jasaýǵa múmkindik beredi.
Bıyl maýsymda Almaty qalasy juqpaly aýrýlar aýrýhanasymen jáne I. Asfendııarov atyndaǵy QazUMÝ- men birge «Alǵashqy sımptomnyń boljamdaryn dıagnostıkalaý jáne jasandy ıntellektini aqparattyq tehnologııaǵa engizý negizindegi COVID-19-dyń aýyr ótý qaýipiniń predıktory» qyzmetin damytý týraly kelisimge qol qoıyldy.
Qazirgi ýaqytta medıtsınalyq aqparattyq júıemen birge pılottyq rejımde osy jobaǵa Ortalyq qalalyq klınıkalyq aýrýhana qosyldy. Qan markerlerine arnalǵan bul qyzmet túri - aýrýdyń aýyr ótý dárejesin boljaýǵa múmkindik beredi. Sol arqyly aýrýhanalar terapııa ádisterin, reanımatsııaǵa jatqyzý qajettiligin nemese kerisinshe bosatýdy josparlaı alady.