Almatyda kóne kilemderdiń kórmesi ótip jatyr

ALMATY. QazAqparat - Almatydaǵy Memlekettik ortalyq mýzeıde «Masatydaı qulpyrǵan…» atty qalpyna keltirilgen kóne kilem men toqyma buıymdardyń kórmesi ashyldy, dep habarlaıdy QazAqparat tilshisi.

Kórmede alǵash ret Qazaqstannyń ońtústik, soltústik jáne batys óńirlerinen dástúrli qazaq kilemderiniń buryn kórmege qoıylmaǵan jáne joǵary kórkemdik-tarıhı mańyzy bar biregeı kollektsııasy usynylady.

«Kórmege qoıylǵan kilemder elimizdiń ońtústik jáne shyǵys óńirlerinde jasalǵan.Olardyń daıydalý ádisi men sıpaty jaǵynan ózine tán ózgeshelikter bar. Kórmeden qaıta qalpyna keltirilgen kilemder men qatar toqyma buıymdaryn tamashalaýǵa bolady. Bul jádigerlerdiń barlyǵy mýzeıimizdiń qorynda saqtalǵan. Tarıhı-mádenı artefaktilerdi qalpyna keltirý ortalyq mýzeı qyzmetiniń mańyzdy baǵyttarynyń biri. Oǵan qosa mýzeıde 1986 jyldan beri restavratsııa bólimi jumys isteıdi. Qazir onda segiz bilikti maman keskindeme, grafıka, qysh, mata buıymdary, kilem-kıiz jáne taǵy basqa baǵyttar boıynsha qyzmet etýde»,- deıdi Mýzeıdiń restovratsııa bóliminiń meńgerýshisi Sholpan Tursynbaeva.

Kórmege 13-ke jýyq túkti kilem men basqurttar, qorjyndar qoıylǵan. Bul buıymdardyń barlyǵy HH ǵasyrdyń birinshi jartysynda jasalǵan, eń kóne kilem 1934 jyly Ońtústik Qazaqstan oblysynda jasalypty.

Uıymdastyrýshylardyń aıtýynsha, kórmeniń basty maqsaty - Ortalyq mýzeı qory negizinde qazaq halqynyń kilem jáne toqyma buıymdarynyń tirshilik qamy fýnktsııasyn, sonymen qatar olardyń jasalý materıaldary men tehnıkasyn, qoldanys aıasyn, sharýashylyq, turmystyq jáne fýnktsııalaryn ashý.