Almatyda kólikterine esirtki tıep alǵan eki júrgizýshi ustaldy
Birinshi avtokólik boıynsha polıtsııa qyzmetkerleri tańǵy jetide Alataý aýdanynyń «Aqsaı» yqshamaýdanynda kúdiktiniń kóligin toqtatqan.
«Bul – D. esimdi azamat basqarǵan Daewoo Nexia kóligi. Jolaýshy 27 jastaǵy er adam. Kólikti tekserý barysynda qara jáne kók tústi ızolentamen oralǵan 39 polıetılen túıinshek tabyldy jáne tárkilendi. Onyń ishinde ózine tán ıisi bar aq tústi untaq tárizdi zat boldy. Sot-hımııalyq saraptamanyń qorytyndysyna sáıkes, tárkilengen zattar sıntetıkalyq mefedron esirtkisi ekeni anyqtaldy. Jastar esirtki qoıýshy retinde qosymsha tabys tabatynyn, tapsyrys tanymal messendjer arqyly qabyldanatynyn moıyndady. Ustalǵandardyń is-áreketteri tergeýmen QR QK-niń 297-baby 3-bóliginiń 5-tarmaǵy boıynsha saralanady. Olar tutqyndaldy. Bul esirtki qylmysy úshin 10 jyldan 15 jylǵa deıin bas bostandyǵynan aıyrý jazasy qarastyrylǵan», – dedi Almaty qalasy polıtsııa departamentiniń Esirtki qylmysyna qarsy kúres basqarmasynyń bastyǵy Erlan Álmaǵambetov.
Ekinshi avtokólik boıynsha Medeý aýdanyndaǵy Ospanov kóshesiniń boıynda polıtseıler taǵy bir kúdikti kólikti toqtatqan. Toyota Camry kóligin 32 jastaǵy K. esimdi azamat basqarǵan.
«Kólikti tekserý barysynda qara ızolentamen oralǵan 4 polıetılen túıinshek tabyldy jáne tárkilendi. Onyń ishinde ózine tán ıisi bar aq tústi untaq tárizdi zat boldy. Sot-hımııalyq saraptamanyń qorytyndysyna sáıkes, tárkilengen zattar asa iri salmaqtaǵy sıntetıkalyq mefedron esirtki zaty bolyp shyqty. Er adamnyń esirtkini qandaı maqsatta saqtaǵanyn jáne tasymaldaǵanyn tergeý anyqtaıtyn bolady. Bálkim, ol shópti satyp, odan aqsha tapqan bolýy da múmkin», – dedi Erlan Álmaǵambetov.
