Almatyda kishkentaı sarbazdarǵa arnalǵan taý lageri ashyldy

ALMATY. QazAqparat – Bolashaq Otan qorǵaýshylar shatyrly lagerdiń turmysyn uıymdastyryp, óz betinshe tamaq daıyndaýdy úırenedi, dep habarlaıdy QazAqparat Qorǵanys mınıstrligine silteme jasap.

Lagerge birinshi bolyp «Kırov», «Shekara qyzmeti departamentiniń jas shekarashylary» jáne №95 jalpy bilim beretin mekteptiń Borıs Kerimbaev atyndaǵy áskerı-patrıottyq klýbtarynyń tárbıelenýshileri bardy.

«Balalar 7 kúndik taý daıyndyǵy baǵdarlamasynan ótip, taýǵa órmeleý, taý týrızmi jáne alpınızm elementterin úırenedi. Jazǵy áskerı-dalalyq lagerlerdiń basty maqsaty – jas armııashylardy áskerı-qoldanbaly jáne patrıottyq tárbıeleýdi qamtıtyn balalardyń demalysyn uıymdastyrý», - dep atap ótti №95 jalpy bilim beretin mekteptiń áskerı jetekshisi Baqytjan Pirimbetov.

Lager jumysy Almaty qalasynyń qorǵanys isteri jónindegi departamenti, Almaty oblysynyń Shekara qyzmeti jáne «Jas sarbaz» qozǵalysy departamentimen birlesip uıymdastyryldy.

Taý daıyndyǵy baǵdarlamasyna sáıkes tárbıelenýshilerdiń jas sanatyna baılanysty birneshe shyńǵa mindetti túrde kóterilý kózdelgen.