Almatyda kimderge áleýmettik tólem beriledi

ALMATY. QazAqparat – Almatyda Tótenshe jaǵdaı rejimi engizilgen kezden bastap tabys kózinen aıyrylǵan azamattarǵa áleýmettik tólem jasaý úshin qujat qabyldaý bastaldy, dep habarlaıdy QazAqparat tilshisi.

Búgin qalalyq Áleýmettik ál-aýqat basqarmasy basshysynyń orynbasary Aınur Muqajanova onlaın brıfıng barysynda áleýmettik tólemder memlekettik áleýmettik saqtandyrý qorynan tólenetinin aıtty.

Bul qarajatty makro jáne mıkro, shaǵyn jáne orta bıznes sýbektileri, jeke kásipkerler, jeke keńsesi bar notarıýstar, sot oryndaýshylary, kásibı medıatorlar, qorǵaýshylar, biryńǵaı jınaq tólemin tólep júrgen azamattar ala alady.

«Jumys berýshi ózi elektrondy úkimet portalyna qajetti qujattardy ózi rásimdeýi kerek. Ol ótinish, jumys berýshiniń TJ kezinde jumys toqtatqany týraly habarlama, barlyq jumysshylarǵa shyǵarylǵan buıryqtardy kórsetýi shart»,- dedi ol.

Jumys berýshiniń aryzy jumyspen qamtý máseleleri boıynsha aýdandyq shtabtarda qaralatyn bolady.

Almatyda ár 8 aýdanda osyndaı shtab qurylǵan.

«Qujattar elektrondy qujat aınalymy arqyly memlekettik korporatsııaǵa beriletin bolady. MEmlekettik korporatsııa men áleýmettik saqtandyrý memlekettik qorynyń bólimsheleri 4 jumys kúni ishinde aqparatty tekseretin bolady. Ár qyzmetkerge qatysty sheshim shyǵaryp, 2 kúnde tizim jasaıdy. Qor qyzmetkerleriniń sheshimi SMS joldaý arqylyhabarlanady», - dedi Aınur Muqajanova.