Almatyda keýde qýysy deformatsııalanǵan jasóspirimge ota jasaldy

ALMATY. QazAqparat - Almatydaǵy №1 qalalyq klınıkalyq aýrýhana dárigerleri keýde qýysy úlkeıip, qabyrǵalary syrtqa tompaıyp shyǵyp ketken 16 jastaǵy patsıentke operatsııa jasady. Ota quny Mindetti áleýmettik medıtsınalyq saqtandyrý (MÁMS) arqyly tólendi, dep habarlaıdy QazAqparat tilshisi.

Anasynyń aıtýynsha, balanyń keýdesindegi patologııa 6 jasynda paıda bolǵan. Ýaqyt óte kele syrtqa tompaıyp shyǵyp ketken.

Jan-jaqty teksere kele, torakaldy hırýrgtar ota jasaý týraly sheshim qabyldaǵan.

Nurlan Jarylqapov pen Muqtar Nysanbaı, anestızıolog Taıva Rakova men operatsııalyq medbıke Dınara Ortalyqtan quralǵan brıgada kúrdeli otany sátti jasap shyqty.

«Operatsııa Mindetti áleýmettik medıtsınalyq saqtandyrý sheńberinde jasaldy. Patsıentke Kandrashın ádisi boıynsha torakaplastıka jasalyp, keýde qýysyna tıtan plastına ornatyldy. Naýqas otadan soń 7 kún ótkennen keıin aýrýhanadan shyqty», - deıdi torakaldy hırýrg Muqtar Nysanbaı.

Dárigerdiń sózinshe, keýde qýysynyń deformatsııasy ádette týabitti nemese júre paıda bolady. Bul aqaý kóbine ul balalarda kezdesedi.

«Ýaqytyly túzetpese asqynyp, patsıenttiń tynys alýy qıyndap, keýde tusy aýyra bastaıdy. Qazir ony hırýrgııalyq jolmen túzetýge bolady», - deıdi ol.

Esterińizge salsaq, 18 jasqa deıingi balalar memleket tarapynan saqtandyrylady jáne medıtsınalyq qyzmetti aqysyz paıdalana alady.