Almatyda «Qazatomónerkásip» UAK spartakıadasy ashyldy
«Qazatomónerkásip» UAK» AQ basqarma tóraǵasy Asqar Jumaǵalıev jarys qatysýshylary men qonaqtaryna óziniń quttyqtaýyn joldady, dep habarlaıdy kazatomprom.kz.
«Qurmetti áriptester, sizderdi osynaý sport merekesimen quttyqtaımyn! Men kompanııamyzda osynshama sportshylar bar ekendigin maqtanysh etemin. Sportty serik etken ujym - naǵyz jeńimpaz ujym. Sport bizdi maqsatqa talpynýshylyqqa, batyldyqqa, shydamdylyqqa tárbıelep, bir komandada jumys isteı bilýge úıretedi. Bul tek sportta emes, sonymen birge kásibı salada da jeńisterge jetýge kómektesetin mańyzdy qasıetter. Barlyqtaryńyzǵa kóterińki kóńil- kúı, sátti starttar, joǵary kórsetkishter jáne jeńis tileımin!» - delingen ulttyq atom kompanııasy basshysynyń quttyqtaýynda.
17-21 tamyz aralyǵynda ótetin Spartakıadaǵa Astana, Almaty qalalarynan jáne Qyzylorda, Ońtústik Qazaqstan, Mańǵystaý, Aqmola, Shyǵys Qazaqstan jáne Almaty oblystarynan kelgen Qazatomónerkásiptiń 800-den astam qyzmetkeri qatysýda. Sport alańdarynda atom salasy kásiporyndarynyń namysyn qorǵaıtyn myqty atletter eń úzdikti anyqtaý úshin synǵa túsedi. Saıystar sporttyń 9 túri boıynsha ótedi: badmınton, shaǵyn fýtbol, jeńil atletıka, voleıbol, basketbol, shahmat, blıts-shahmat, bılıard, ústel tennısi.
«Qazatomónerkásip» UAK» AQ - Qazaqstannyń ýran jáne onyń qosyndylaryn, sırek metaldar, atom elektr stansalaryna arnalǵan ıadrolyq otyn, arnaıy qural-jabdyqtar, tehnologııalar jáne ekiudaı maqsattaǵy materıaldar eksportymen aınalysatyn ulttyq operator. Kompanııa qyzmetiniń basty baǵyttary geologııalyq barlaý, ýran óndirisi, ıadrolyq otyn tsıkly ónimderin óndirý, reaktor jasaý, AES qurylysy, konstrýktsııalyq materıaldar óndirisi, energetıka, ǵylymı zertteý, áleýmettik qamtý jáne mamandar daıyndaý bolyp tabylady. Qazatomónerkásip sondaı-aq, Qazaqstanda jańartylatyn energetıkany damytý baǵdarlamasynyń belsendi qatysýshysy. Búgingi tańda kompanııada 27 myńnan astam adam eńbek etedi. Qazatomónerkásip álemniń jetekshi ýran óndirýshi kompanııalarynyń kóshin bastap keledi.
