Almatyda qarjy pıramıdalaryn uıymdastyrǵandar sottaldy
Qarjylyq pıramıdalardyń qylmystyq áreketterinen 500-ge jýyq adam zardap shekken. Keltirilgen shyǵynnyń jalpy somasy 1,5 mıllıard teńgeni qurady.
«Olardyń biri – 33 jastaǵy A.Lım esimdi azamat. Ol 2017 jyldyń aqpan aıynan 2018 jyldyń tamyz aıyna deıin alaıaqtyq áreketter jasaý maqsatynda azamattardan ınvestıtsııa (qarajat) tartyp, «LS ins» JShS qurǵan. Azamattar salǵan qarajatty tolyq kólemde jáne eshbir táýekelsiz qaıtarýǵa jalǵan kepildik bere otyryp, sporttyq oıyndardyń nátıjelerine aqsha qoıý arqyly paıda kórgisi kelgen. Kóbirek baıý maqsatynda L.esimdi azamat ınvestıtsııalanǵan qarajat boıynsha syıaqyny kez kelgen ýaqytta, ártúrli tásildermen: kartaǵa, banktik shotqa nemese keńsege aýdarý arqyly alýǵa bolatynyna «kepildik berdi». Aldanǵan azamattardyń aryzdary boıynsha 188 qylmystyq is tirkelip, jalpy shyǵyn 1 440 281 000 teńgeni qurap otyr», – dedi Almaty qalalyq polıtsııa departamenti bastyǵynyń orynbasary Rústem Ábdirahmanov.
Almaly aýdandyq sotynyń qaýlysymen A.Lım 6,5 jylǵa bas bostandyǵynan aıyryldy.
«Sonymen qatar, Tergeý basqarmasynyń óndirisinde D.Aldabergenovaǵa qatysty qylmystyq is qozǵaldy. Ol áleýmettik jeli arqyly ınvestıtsııalyq jobanyń ashylǵanyn habarlaǵan. Jobanyń máni býkmekerlik keńselerde, sondaı-aq, ártúrli bıznes jobalarǵa stavka jasaý úshin salym salý arqyly qarajatty kóbeıtý boldy. Osylaısha, salymshylar D.Aldabergenovaǵa jáne basqa adamdarǵa 30% jáne 50% paıda alý úshin bank kartochkalary arqyly aqsha aýdarǵan, biraq, qarajatty aýdarǵandarymen keıin olar paıdany almaǵan. Kúdikti Almaly aýdandyq sotynyń sýdıasymen alty jyl, segiz aıǵa bas bostandyǵynan aıyryldy», – dedi Ábdirahmanov.
