Almatyda kardıologtar júrekke biregeı operatsııa jasady

ALMATY. QazAqparat- Almatydaǵy kardıologııa jáne ishki aýrýlar ǵylymı-zertteý ınstıtýtynda alǵash ret 58 jastaǵy patsıentke endovaskýlıarlyq mıtraldi qaqpaqsha ımplantatsııalandy, dep habarlaıdy QazAqparat tilshisi.

Dárigerler 58 jastaǵy patsıentte júre paıda bolǵan júrek aqaýy, mıtraldi qaqpaqshanyń jetkiliksizdigi, júrektiń ıshemııalyq aýrýy dıagnozyn qoıdy.

Belgili bolǵanyndaı, naýqas 3 jyl buryn mıokard ınfarktisine shaldyqqan. Oǵan mıtraldi qaqpaqshanyń plastıkasy, mamarokoronarlyq jáne aortokoronarlyq aýtovenozdy shýnttaý jasalǵan.

Eshqandaı áser bolmaǵandyqtan, oǵan mıtraldi qaqpaqshany transkateterlik ımplantatsııalaý (TMVI) usynyldy.

Mıtraldi qaqpaqshany protezdeý mıtraldi stenozdy emdeýdiń negizgi ádisi. Sondaı-aq, ımplantatsııalaý mıtraldi qaqpaqshanyń jetkiliksizdigi - qaqpaqshanyń qandy keri ótkizgen jaǵdaıda jasalady.

«Bizdiń klınıkada sońǵy 3 jylda qolqa qaqpaqshasyn endovaskýlıarly ımplantatsııalaý (TAVI) boıynsha joǵary tehnologııalyq operatsııalar sátti jasalyp júr, al tehnıkalyq jaǵynan ozyq jáne kúrdeli operatsııalardyń biri sanalatyn mıtraldi qaqpaqshany transkateterlik ımplantatsııalaýdy (TMVI) biz alǵash ret jasadyq», - deıdi Kardıologııa jáne ishki aýrýlar ǴZI Basqarma tóraǵasy Marat Pashımov.

Rentgenoperbloktyń meńgerýshisi Alekseı Kolesnıkovtyń aıtýynsha, mıtraldi qaqpaqshanyń endovaskýlıarlyq protezdeýi - mıtraldi stenozben aýyratyn naýqastardy hırýrgııalyq emdeýdiń ońtaıly túri, sebebi mundaı dıagnozy bar naýqastarǵa dástúrli hırýrgııalyq operatsııalar jasaǵanda ólim qaýpi joǵary bolady.

Bul operatsııa mıtraldi aqaýy bar qan tamyrlarynyń zaqymdanýy, ókpeniń, baýyrdyń sozylmaly aýrýlary, endokrındik patologııa, onkologııa sııaqty kúrdeli aýrýlarǵa shaldyqqan naýqastarǵa kórsetilgen.

«Mıtraldi qaqpaqshany aýystyrý úlken hırýrgııalyq kesýlersiz, jasandy qan aınalymy men jalpy narkozsyz, rentgendik baqylaýmen sannyń kóktamyryn tesý arqyly júzege asyrylady. Bul tehnologııanyń artyqshylyqtarynyń biri - tós súıegin tilý áserlerin, ıaǵnı, qan joǵaltý, patsıenttiń aýyrsyný sındromynyń qarqyndylyǵyn, operatsııadan keıingi tigispen baılanysty ınfektsııa qaýpin azaıtady. Endovaskýlıarlyq tehnologııany qoldaný patsıentterdiń ońaltý kezeńin de edáýir qysqartady»,- deıdi ol.

Dáriger qazir naýqastyń jaǵdaıy jaqsy ekenin atap ótti.