Almatyda karantın talaptaryn saqtamaǵan 45 nysannyń qyzmeti toqtatyldy
Almaty qalasy sanıtarııalyq-epıdemıologııalyq baqylaý departamenti basshysy mindetin atqarýshysynyń orynbasary Sádýaqas Baıǵabylovtyń málimetinshe, aǵymdaǵy jyly qalada 50 849 nysan tekserilip, onyń 4724 nysanynda karantındik shekteýlerdiń saqtalmaǵany anyqtaldy.
«Karantındik shekteý krıterıılerin buzǵany úshin 793 zańdy tulǵaǵa jalpy somasy 277 mln teńge, maska rejımin buzǵany úshin 6 234 turǵynǵa 274,2 mln teńge aıyppul salyndy. Sottar karantındik sharalardy qasaqana buzǵan 45 nysannyń qyzmetin toqtatty. Qoǵamdyq kólikti tekserý barysynda maska rejımin buzǵan 849 turǵyn ákimshilik jaýapkershilikke tartyldy. Temirjol vokzaldarynda 17 adamǵa jáne áýejaıda 19 adamǵa aıyppul salyndy», - dedi Sádýaqas Baıǵabylov.
Aıta keteıik, Almatyda indet bastalǵaly beri KVI-diń 183,2 myń jaǵdaıy, onyń ishinde 164 myńy bıyl tirkelgen.