Almatyda Qala qurylysy keńesi quryldy
Bıyl 30 maýsymda Memleket basshysy Qasym-Jomart Toqaev «Almaty qalasynyń aıryqsha mártebesi týraly» QR Zańyna, onyń ishinde Qala qurylysy keńesin qurý týraly erejeni qamtıtyn túzetýlerge qol qoıdy. Qujat maqsaty – qala qurylysy saıasatyn iske asyrý kezinde sheshimder qabyldaýdyń tıimdiligin arttyrý jáne qalanyń ornyqty jáne teńgerimdi damýyn qamtamasyz etý. Zań alǵashqy resmı jarııalanǵan kúnnen keıin kúntizbelik 60 kún ótken soń, ıaǵnı 2022 jylǵy 1 qyrkúıekten bastap qoldanysqa engiziledi.
1 tamyzda Almaty ákimi E. Dosaevqa Qala qurylysy keńesin qurý jónindegi qujattardyń jobasy usynyldy jáne qaýlyny, erejeni ázirleý, onyń quramyn bekitý jónindegi rásimder bastaldy. Búgin, 19 tamyzda tıisti qaýlyǵa qala basshysy qol qoıdy.
Endi Almaty qalasy ákimdigi Keńestiń 23 adamnan aspaıtyn quramyn bekitedi. Sondaı-aq onyń fýnktsııasy, ókilettigi, qurylymy men jumys tártibi aıqyndalady. Qala qurylysy keńesiniń quramyna sáýlet, qala qurylysy, ýrbanıstıka, kólik, ınklıýzııa, ekologııa, kreatıvti ekonomıka, áleýmettaný, ekonomıka jáne ózge de salalardaǵy sarapshylar enedi. Sonymen qatar qaralatyn máselelerdiń ereksheligine baılanysty Keńes otyrystaryna ózge de sarapshylar shaqyrylyp otyrady.
Almatynyń Qala qurylysy keńesi iske asyrýǵa usynylatyn jobalar boıynsha sheshimderdi ashyq talqylaý jáne qabyldaý úshin konsýltatıvtik-keńesshi organ bolyp tabylady.
Qala qurylysy keńesiniń negizgi fýnktsııalary:
- qala aýmaǵynda sáýlet, qala qurylysy jáne qurylys qyzmeti salasynda sheshimder qabyldaý kezinde memlekettik saıasatty iske asyrýda jergilikti atqarýshy organdarǵa járdemdesý;
- turǵyn úı, qoǵamdyq, kommýnaldyq-óndiristik jáne ónerkásiptik keshenderdiń eskızdik jáne jumys jobalary, qoǵamdyq aýmaqtardy, saıabaqtardy, skverlerdi, baqtardy, býlvarlardy, arnaıy aımaqtardy qaıta qurý jobalary, ártúrli maqsattaǵy jeke ǵımarattar, ınjenerlik jáne kóliktik ınfraqurylym jelileri men qurylystary, óner obektileri, tarıh, sáýlet mádenıeti eskertkishteri boıynsha usynymdardy qaraý jáne ázirleý;
- ál-Farabı dańǵylynan joǵary qala qurylysy jáne jalpy qurylys jobalaryn qaraý;
- mádenı maqsattaǵy obektilerdi salý, rekonstrýktsııalaý jáne jóndeý jónindegi jobalardy qaraý;
- turǵyn úı qoryn renovatsııalaý boıynsha jobalardy qaraý.
