Almatyda Gerold Belgerge arnalǵan memorıaldy kabınet ashyldy

ALMATY. QazAqparat - Almatydaǵy QR Ulttyq kitaphanasynda «Parasat», «Dostyq» ordenderiniń ıegeri, jazýshy Gerold Karlovıch Belger atyndaǵy memorıaldy kabınet ashyldy, dep habarlaıdy QazAqparat tilshisi.

 
Búgingi sharada «Pletene chepýhı» kitabynyń tusaýy kesilip, «Gerold Belger» derekti fılmi kórsetildi.

Arnaıy uıymdastyrylǵan sharaǵa zııaly qaýym, jazýshylar men Gerold Belgerdiń zaıyby qatysty.

   

Gerold Belger 1934 jyly qazanda Reseıdiń Saratov oblysynda, Volga boıyndaǵy nemis ASSR-inde etnıkalyq nemis otbasynda dúnıege kelgen. 1941 jyly Stalınniń jarlyǵymen barlyq nemistermen birge Soltústik Qazaqstandaǵy qazaq aýylyna jer aýdarylǵan. Qazaq tilinde mektepte bilim alyp shyqqan Gerold Belger Almatydaǵy Qazaq pedagogıkalyq ınstıtýtynyń (qazirgi Abaı atyndaǵy ýnıverstıtet) fılologııa fakýltetin támamdaǵan.

Sanaly ǵumyryn ádebıetke arnaǵan ol 60 kitap pen qazaq, orys, nemis tilderinde 2 myńǵa jýyq eńbek jazǵan.

B.Maılın, Á.Nurpeıisov, Á.Kekilbaev, D.Dosjanov jáne taǵy da basqa qazaq jazýshylarynyń, nemistiń A.Raımgen, E.Konchak, N.Vakker syndy qalamgerleriniń týyndylaryn aýdarǵan.

Gerold Belger -  B.Maılın atyndaǵy syılyqtyń, Prezıdenttiń Beıbitshilik pen rýhanı tatýlyq syılyǵynyń ıegeri.

2015 jyly aqpanda dúnıeden ótken bolatyn.