Almatyda ǵaryshtyq tehnologııalar boıynsha halyqaralyq baıqaýdyń fınaly ótedi
Mektep, kolledj oqýshylary men joǵary oqý oryndarynyń stýdentteri arasyndaǵy baıqaý ótken jyldyń 16 jeltoqsanynda bastaldy.
Shara Qazaqstandaǵy balalar jyly aıasynda ótkizilýde. Fınaldyq týr 8-10 sáýir aralyǵynda Ǵ. Dáýkeev atyndaǵy Almaty Energetıka jáne baılanys ýnıversıtetinde ótedi.
«Ulttyq ǵaryshtyq zertteýler men tehnologııalar ortalyǵy» AQ Basqarma tóraǵasy Marat Nurǵojıniń aıtýynsha, baıqaýǵa Qazaqstan, Qyrǵyzstan, Reseı jáne Ýkraınanyń 50-den astam oqý orny, sonyń ishinde QR jetekshi tehnıkalyq jáne kópsalaly joǵary oqý oryndary qatysýǵa nıet bildirgen.
15 naýryzǵa deıin halyqaralyq sarapshylyq keńes baıqaýdyń fınaldyq kezeńine ótken qatysýshylardy anyqtap, 16-20 naýryz aralyǵynda fınaldyq týrǵa irikteý júrgizedi.
«Bizdiń salaǵa jańashyldyq qajet. Jastar bizge jańa ıdeıalardy, jańa sheshimderdi, jańalyqtardy usyna alady. Qazir ǵarysh salasy 2030 jylǵa deıingi damý tujyrymdamasyn daıyndap jatyr. Barlyq jańa tehnologııa men ıdeıalar osy tujyrymdamada kórinis tabady. Biz naqty praktıkalyq maqsattardy kózdep otyrmyz», - dedi Marat Nurǵojın brıfıng barysynda.
Baıqaýdyń maqsaty - Qazaqstan Respýblıkasynyń jáne basqa elderdiń oqý oryndarynyń stýdentteri arasynda ǵaryshtyq tehnıka jáne tehnologııalar salasyndaǵy ǵylymı-tehnıkalyq shyǵarmashylyqty tanymal etý. Halyqaralyq olımpıadalar men baıqaýlarǵa qatysý úshin eń úzdik joba boıynsha komandalardy tańdaý jáne Qazaqstan Respýblıkasynda jáne sheteldegi mektep, kolledj oqýshylarynyń jáne stýdentterdiń deńgeıles kommýnıkatsııalaryn qalyptastyrý, damytý.
Baıqaýǵa qatysýshylarǵa sertıfıkattar, al jeńimpazdar men júldegerler dıplomdarmen, aqshalaı jáne estelik syılyqtarmen marapattalady. Olar sondaı-aq iri halyqaralyq jarystarǵa, aeroǵarysh salasyndaǵy joǵary tehnologııalyq kompanııalarǵa ekskýrsııalarǵa qatysýǵa múmkindik alady.
Konkýrsqa 7 men 22 jas aralyǵyndaǵy QR jáne álemniń basqa elderiniń qosymsha bilim berý júıeleriniń mektepteri men úıirmeleriniń oqýshylary, kolledjder men joǵary oqý oryndarynyń stýdentteri ózderiniń oqytýshylary men tálimgerlerinen turatyn komandalar quramynda qatysa alady. Jobalyq komandalardyń jattyqtyrýshylary (koých) / tálimgerleri /jetekshileri / tıýtorlary retinde áreket etetin memlekettik jáne bıznes-qurylymdardyń ǵalymdary men ınjenerleriniń jobalyq komandalar quramynda qatysýy quptalady.
Baıqaý nomınatsııalarynyń taqyryptary:
- Halyqaralyq ǵarysh stantsııasyndaǵy ǵylymı eksperımentter jáne zertteýler;
- Ónerkásiptiń negizgi salalary men qyzmet kórsetý salalaryna (taý-ken ónerkásibi, munaı-gaz, metallýrgııa, elektr energetıkasy, telekommýnıkatsııalar, avtomobıl, temirjol jáne áýe kóligi, aýyl sharýashylyǵy, qarjy, týrızm jáne t.b.), «jasyl» ekonomıkaǵa, kómirtegi izin azaıtý jáne energetıkany dekarbonızatsııalaý úshin arnalǵan ǵaryshtyq tehnıka jáne tehnologııalardyń qoldanbaly sheshimderi;
- Ǵarysh tehnıkasy, zertteýler men eksperımentterge arnalǵan elektronıka jáne radıoelektronıka, robottehnıkalyq jáne zııatkerlik júıeler;
- Ǵarysh tehnıkasyn, shaǵyn ǵarysh apparattary (ShǴA) jáne tasymaldaǵysh zymyrandardy modeldeý jáne qurastyrý;
- Ǵaryshtyq baılanysqa, navıgatsııaǵa jáne JQZ-ǵa (Jerdi qashyqtyqtan zondtaýǵa) arnalǵan aqparattyq tehnologııalar;
- Aeroǵarysh ónerkásibi kásiporyndary men ǵarysh apparattaryn basqarýǵa arnalǵan ontologııalyq modeldeý jáne mýltıagentti tehnologııalar;
- Qazaqstannyń aeroǵarysh salasynyń qoldanystaǵy jáne jańa kásiporyndarynyń tıimdiligi men kiristiligin arttyrý úshin ÓEShT (Ónertapqyshtyq esepterdi sheshý teorııasy) ádisnamasy men quraldaryn qoldanatyn jobalar, Baıqońyr ǵarysh aılaǵynyń ındýstrııalyq-ınnovatsııalyq jáne týrıstik áleýetin damytýdy qosa alǵanda;
- Ǵarysh tehnıkasyndaǵy 3D basyp shyǵarýdyń addıtıvti tehnologııalary;
- Ǵarysh apparattaryn jáne ǵarysh salasyndaǵy kásiporyndardy basqarýǵa arnalǵan jasandy ıntellekt jáne emerdjenttik (toptama) ıntellekt;
- Ǵarysh salasyndaǵy úlestirilgen tizilimniń IT-tehnologııalary jáne blokcheın;
- Astronomııa / Astrofızıka / Metaverse (Meta-ǵalam) / VR (Virtual Reality -vırtýaldy shyndyq) / AR (augmentedreality - tolyqtyrylǵan shyndyq) jobalary;
- Ǵaryshty ıgerý salasyndaǵy túrli elder oqý oryndarynyń halyqaralyq yntymaqtastyǵy boıynsha PR-beıne-rolıkter.
Baıqaýdy QR Tsıfrlyq damý jáne aeroǵarysh ónerkisibi mınıstrligi Aeroǵarysh komıtetiniń «Ulttyq ǵaryshtyq zertteýler men tehnologııalar ortalyǵy» AQ, «EurasianSpaceVentures» JShS jáne «Qazaqstandyq jobalardy basqarý ınstıtýty» QQ uıymdastyryp otyr.
