Almatyda Gakku daýysy kontsertiniń kórermenderi 94 myńǵa jýyq gúldi taptap tastady
Almaty qalalyq ekologııa jáne qorshaǵan orta basqarmasynyń málimetinshe, shyǵyn somasy 13 mln teńgeden asty – bir jyldyq, kóp jyldyq butalar men gúlder, onyń ishinde qalanyń jaqyn mańdaǵy gúlzaryndaǵy raýshandar joıyldy. Barlyǵy 94 myńǵa jýyq gúl taptalyp ketken.
Budan bólek, kontsert ótken Almaly aýdanynda 13 oryndyq, 1 jaryq baǵanasy, granıt qoqys jáshigi, eki kameranyń negizi qıraǵan.
«Almaty qalasynyń ákimdigi elimizdiń mádenı ortalyǵy bolyp tabylatyn megapolıstiń turǵyndary men qonaqtarynan jasyl jelekterge jáne gúlderge uqypty qaraýdy, sondaı-aq qalany abattandyrý men kógaldandyrýmen aınalysatyn qyzmetkerlerdiń eńbegin qurmetteýdi suraıdy. Keltirilgen zalal qala ákimdiginiń kúshimen qalpyna keltiriledi-jańa ósimdikter qysqa merzimde otyrǵyzylady»,- dep habarlady qalalyq ákimdikten.
Aıta keteıik, kún saıyn qala aýmaǵyn sýarý men kógaldandyrý jumystaryna 300-ge jýyq maman men 80-nen asa arnaıy tehnıka jumyldyrylady. Dekoratıvti kógaldandyrýdyń jalpy aýmaǵy - 159 myń sharshy metr, al gazon aýmaǵy - 26 myń sharshy metr.
Foto: t.me/almaty_akimat