Almatyda esirtki zerthanasy anyqtaldy: 150 mln teńgeniń shıkizaty tárkilendi
Almaty qalalyq polıtsııa departamentiniń málimetinshe, esirtki daıyndaıtyn tseh «Qalqaman» yqshamaýdanyndaǵy jeke úıdiń jertólesinde jumys istegen. Belgili bolǵandaı, úı ótken jyldyń qazan aıynda jas jigitke aı saıynǵy 300 myń teńgege jalǵa berilgen.
«Ruqsat etilgen tintý kezinde untaq jáne kesek túrindegi zattar, plastık ydystar, elektrondy tarazylar jáne mefedron sıntetıkalyq psıhotroptyq zatyn óndirý kezinde qylmyskerler paıdalanǵan basqa da dúnıeler tárkilendi. Esirtki shyǵarýǵa jaýapty – 23 jastaǵy O.esimdi azamat. Aıaqtalmaǵan medıtsınalyq bilimi bar jas jigit, esirtki óndirisin jolǵa qoıǵan. Jalpy, esirtki zerthanasynan birneshe keli keptirilgen shóp tárkilendi. Sotqa deıingi tergeý bastaldy», – dedi Almaty qalalyq polıtsııa departamenti bastyǵynyń orynbasary Berik Ábilbekov.
Polıtsııa qyzmetkerleri jedel túrde esirtki bıznesine taǵy bes adamnyń qatystylyǵyn anyqtady, olardyń ekeýi 23 jáne 19 jastaǵy qyzdar.
Olar – Túrkistan jáne Almaty oblystarynan kelgen. Olardyń mindetterine daıyn esirtkilerge betbelgi qoıý kirdi. Kúdiktiler qamaýǵa alyndy.
«Qylmysty uıymdastyrýshynyń aıtýynsha, ol Telegram-daǵy kýratordyń nusqaýy boıynsha áreket etken. Zerthanaǵa arnalǵan quramdas bólikterdi Almaty oblysy Talǵar aýdany aýmaǵyndaǵy «betbelgiler» arqyly alǵan. Bir apta ishinde ol 2-3 kelige jýyq sıntetıkalyq esirtki jasaǵan, jumysy úshin bıtkoınmen apta saıyn 280 myń teńge kóleminde qarajat alyp otyrǵan. Saraptama qorytyndysy boıynsha, tárkilengen zattar jalpy salmaǵy 4 keliden asatyn «A-PVP» sıntetıkalyq esirtki zaty, mefedron – 312 gramm jáne 15 lıtr týlýol (prekýrsor). Shıkizat baǵasy – 150 mln teńge», – dedi Ábilbekov.
