Almatyda esirtki satýmen aınalysqan 32 jastaǵy áıel ustaldy

ALMATY. QazAqparat - Almatyda esirtki satýmen aınalysqan 32 jastaǵy áıel ustaldy, dep habarlaıdy QazAqparat.

Almaty qalalyq Polıtsııa departamentiniń málimetinshe, kúdiktini «Býran-183» patrýldik ekıpajy Seıfýllın men Raıymbek dańǵylynyń qıylysynda ustady.

«1989 jyly týǵan A. esimdi áıeldiń is-áreketi ınspektorlarǵa kúdikti bolyp kórindi, ol patrýl kóligin kóre salysymen qasha jónelgen. Sebebin anyqtaý úshin tártip saqshylary ony ustady. Anyqtalǵandaı, áıel qylmystyq saýdamen aınalysqan jáne ustalmas buryn klıentpen aldyn ala kelisilgen jerge esirtkiniń tórt býmasyn qoıyp úlgergen. Sonymen qatar, tekserý kezinde taǵy 10 býma tabyldy»,- dedi Jetisý aýdandyq polıtsııa basqarmasynyń bastyǵy Darhan Musanov.

Bul fakti boıynsha sotqa deıingi tergeý bastaldy.