Almatyda erekshe qajettiligi bar balalarǵa arnalǵan basseın salynady
«Atakent» qazaqstandyq iskerlik yntymaqtastyq ortalyǵynyń málimetinshe, erekshe qajettilikteri bar balalarǵa arnalǵan basseın «Delfın» keshenin qaıta qurý jobasy aıasynda iske qosylady.
«Sport kesheninde eni 21 metr jáne uzyndyǵy 25 metr bolatyn eki ámbebap basseın paıda bolady. Basseınderdiń 1,4 metrden 2 metrge deıin jetetin jobalyq tereńdigi sportshylarǵa, áýesqoılar men múmkindigi shekteýli balalarǵa arnalǵan júzý baǵdarlamalaryn uıymdastyrýǵa múmkindik beredi. Basseınder sýdaǵy jattyǵý protsesin barynsha jeńildetetin kótergishtermen, tutqalarmen jáne tehnıkalyq qurylǵylarmen jabdyqtalady. Biz erekshe balalarǵa kómektesýge qýanyshtymyz, sport keshenindegi bilikti jattyqtyrýshylarmen ótkiziletin jattyǵýlar olardyń fızıkalyq damýyna oń áserin tıgizedi jáne áleýmettik turǵydan tez beıimdelýine kómektesedi dep úmittenemiz», - dep atap ótti joba isteriniń jetekshisi Azat Jıenbaev.
Aıta keteıik, keshe shahar ákimi Erbolat Dosaevpen kezdesýde Jetisý aýdanynyń turǵyny árbir sport kesheni erekshe qajettilikteri bar balalardy qabyldaýǵa daıyn emes ekenin aıtqan edi.
«Almaty qalasynyń sport basqarmasynyń málimetinshe, shaharda erekshe qajettilikteri bar adamdarǵa tolyqtaı nemese ishinara beıimdelgen 20-dan astam sport nysany bar. Biraq kelýshilerdiń osy sanattaǵy ókilderi úshin arnaıy jabdyqtarmen jabdyqtalǵan basseınder jetispeıdi. 2024 jyldyń ortasyna qaraı aıaqtalýy tıis «Delfın» sport keshenin qaıta qurý aıasynda erekshe qajettilikteri bar balalarǵa arnalǵan ońaltý kabınetin ashý da josparda, onda olar mamandardan keńes alady»,- dedi Azat Jıenbaev.
