Almatyda «Elbasy joly. Astana» fılmi kórsetildi
Fılmdi QR Mádenıet jáne sport mınıstrligi tapsyrysy boıynsha «Sataıfılm» kınokompanııasynyń qatysýymen Sh.Aımanov atyndaǵy «Qazaqfılm» kınostýdııasy túsirdi. Kórkem kınotýyndynyń rejısseri - Aqan Sataev.
«Qazaqfılm» kınostýdııasynyń eń iri jobalarynyń biri bolyp sanalatyn fılmniń saltanatty kórsetilimi shyǵarmashylyq toptyń qatysýymen ótti.
«Osyndaı iri jobada jumys isteý men úshin jáne meniń komandam úshin úlken qurmet. Bizdiń fılm barlyq kórermenderge arnalǵan, óıtkeni bul fılmde bárimizge ortaq - elimizdiń tarıhy baıandalady. Úlken aǵa-ápkelerimizden bastap, ini-qaryndastarymyzǵa deıin bul týyndy qyzyqty bolatynyna senimdimin. Fılmdi qyzyqty ári shynaıy etip jasaýǵa tyrystyq. Kartına tarıhı faktilerge negizdelgen, sondyqtan da fılmdegi barlyq keıipkerler de shynaıy ómirdegi adamdar, bolǵan oqıǵalardyń kýágerleri» , - dedi rejısser Aqan Sataev.
Aıta ketsek, «Elbasy joly. Astana» - «Elbasy joly» kınoepopeıasynyń altynshy bólimi. Onyń aldynda túsirilgen «Balalyq shaǵymnyń aspany», «Ot-ózen», «Temirtaý», «Tyǵyryqtan jol tapqan», «Juldyzdar toǵysqanda» fılmderi kórermenniń ystyq yqylas-iltıpatyna bólengeni týraly aıta ketken jón.
«Elbasy Joly. Astana» fılmine elordamyz - Astananyń salyný tarıhy arqaý bolǵan. Oqıǵa 1994 jyldyń shilde aıynan bastaý alady. Keńes odaǵy qulaǵannan keıin Qazaqstannyń táýelsiz dara joly bastalady. Ekonomıkalyq daǵdarys pen saıası turaqsyzdyqqa tap bolǵan sol bir qıyn-qystaý kezeńderde, Memleket basshysy astanany Almatydan Aqmolaǵa kóshirýdi usynady. Bul usynys barsha halyq úshin kútpegen oqıǵa boldy, mundaı sheshimniń iske asatynyna jáne onyń jemisti bolatynyna eshkim senbedi. Biraq qaýip-qater men qarama-qaıshylyqtarǵa qaramastan, kópshiliktiń kúdikterine, kúmánshilderdiń syny men qarjylyq qıyndyqtarǵa tótep bere otyryp, Prezıdenttiń basshylyǵymen elimiz mejelengen maqsatty iske asyrdy. 1998 jyldyń 10 maýsymynda jańa astana - Astana qalasynyń halyqaralyq tusaýkeseri ótkizildi.
Fılmniń stsenarıin Ádilbek Jaqsybekov jáne Tımýr Jaqsylyqov birlesip jazǵan. Kórkem týyndynyń túsirý jumystary byltyr jeltoqsan aıynda qolǵa alyndy. Kartınanyń negizgi túsirilimderi Astanada júrgizildi. Mysaly, negizgi túsirilimder elordany Almatydan Astanaǵa aýystyrǵannan keıingi Prezıdent N. Á. Nazarbaev 1997-2004 jyldary aralyǵynda jeti jyl boıy jumys istegen alǵashqy rezıdentsııasy - Elbasy kitaphanasynyń mýzeıi ǵımaratynda júrgizildi. Munda joǵary deńgeıdegi kezdesýler men kelissózder ótkizilip, elimizdiń taǵdyryna qatysty sheshimder qabyldandy. Alǵashqy keıpinde saqtalǵan Memleket basshysynyń kabıneti, qabyldaý jáne otyrys zaldary sol jyldardaǵy jumys kúnderdiń atmosferasyn birden bere aldy.
Fılmge túsken akterler týraly da aıta ketken jón. N.Nazarbaevtyń rólin teatr jáne kıno akteri Murat Ahmanov somdady. Sondaı-aq fılmge Erkebulan Daıyrov, Jan Baıjanbaev jáne basqa da tanymal kıno juldyzdary tústi. Aıta ketsek, osy jobaǵa brıtandyq grım boıynsha sýretshi, «Oskar» júldesiniń ıegeri Mark Koler arnaıy shaqyryldy. Ol Margaret Tetcher jáne Ýınston Cherchıldiń obrazdaryn jasaǵan.
Fılmniń túsirilimderine Prezıdenttiń keńse qyzmetkerleri, protokol qyzmeti men Memleket basshysy kúzet qyzmetkerleri keńesshi bolyp arnaıy tartyldy.
