Almatyda ekojúıeni baqylaý beketteriniń sany artty
Halyqpen kezdesý barysynda qalanyń ekologııalyq jaǵdaıy boıynsha kóptegen másele talqylandy.
Mınıstr Almaty birneshe jyldan beri eń lastanǵan qalalar tizimine enip kelgenin aıtty. Jyl saıyn qala atmosferasyna shamamen 138,7 myń tonna lastaýshy zattar shyǵarylady. Lastaný jylý kózderiniń (JEO-2 jáne JEO-3), jeke turǵyn úılerdiń jáne transporttyń shyǵaryndylarymen baılanysty. Budan bólek, Almaty qalasynyń atmosferalyq aýasynyń jaı-kúıine Almaty oblysynyń 3 irgeles aýdandaryndaǵy gazdandyrylmaǵan óńirlerdiń shyǵaryndylary teris áser etýde.
Bıylǵy 9 aıda el boıynsha atmosferaǵa 900 myń tonnaǵa jýyq lastaýshy zat shyqsa, sonyń 31,9 myń tonnasy Almaty úlesinde. 2021 jyldyń tıisti kezeńimen salystyrǵanda el boıynsha shyǵaryndylar 18% tómen (1,1 mln tonna), Almatyda 28,4% tómen (44,6 myń tonna).
Sondaı-aq S.Brekeshev qalanyń ekologııalyq jaǵdaıyn jaqsartý jónindegi sharalar kesheni almatylyqtardyń pikirlerin eskere otyryp jasalǵanyn atap ótti. Osy oraıda, qaladaǵy ekojúıeni baqylaý beketteriniń sany 16-dan 40-qa deıin artty. Barlyq jańa beketterdi qoǵamdyq uıymdardyń kúshteri uıymdastyryp, Qazgıdromettiń biryńǵaı monıtorıng jelisine biriktirildi (11 beket – Eko sarapshy, 10 datchık – Pavel Plotıtsyn, 3 beket – Skaımaks). Sondaı-aq Almaty qalasynyń ákimdigi Azııa damý bankiniń kómegimen Qazgıdromettiń AirKZ mobıldik qosymshasymen ıntegratsııalanǵan taǵy 50 datchık ornatady.
Almaty ákimdigi dızeldi qoǵamdyq kólikti satyp alýǵa tyıym saldy. Qazirdiń ózinde 827 elektr jáne gaz avtobýstary satyp alyndy. Osy jyldyń sońyna deıin ekologııalyq taza qoǵamdyq kóliktiń jalpy sany 40% quraıtyn bolady. Al 5 jyl ishinde qalalyq kólikti tolyǵymen gaz ben elektr energııasyna aýystyrý josparlanýda.
Foto : gov.kz