Almatyda dinı birlestikter keńesi ótti

ALMATY. QazAqparat - Almaty qalasy ákiminiń orynbasary Erjan Babaqumarovtyń tóraǵalyǵymen ákimdiktiń janyndaǵy dinı birlestiktermen baılanys jónindegi qalalyq keńestiń otyrysy ótti, dep habarlaıdy QazAqparat tilshisi.

Keńes quramyna jetekshi konfessııalardyń jetekshileri, dintanýshylar kiredi.

Keńestiń negizgi maqsaty – dinı senimderge qatysty usynys pen usynymdar ázirleý, qoǵamdaǵy rýhanı kelisimdi nyǵaıtý jáne konfessııaaralyq qatynastardy úılestirý.

Mańyzdy mindetterdiń biri – konflıkt aımaqtaryn anyqtaý jáne ishki ári konfessııalar arasyndaǵy tiketireske jol bermeý.

Kezdesý barysynda ekinshi jartyjyldyqtaǵy konfessııaaralyq kelisimdi nyǵaıtý boıynsha jumys jospary qaraldy, onyń ishinde jyl saıyn 18 qazanda atap ótiletin rýhanı kelisim kúni.

Sonymen qatar, aldaǵy kezeńge arnalǵan mindetter talqylandy.

Kezdesýge qatysýshylar dinı ahýal týraly óz pikirlerimen bólisip, qaladaǵy konfessııalar arasynda rýhanı baýyrlastyqty nyǵaıtý jóninde usynystaryn aıtty.

Keńes tóraǵasy, ákimniń orynbasary Erjan Babaqumarov memlekettik-konfessııalyq qatynastar máselelerine erekshe nazar aýdarylatyndyǵyn atap ótti.

Almatyda 100-den astam túrli etnos ókilderi, sondaı-aq eldegi 18 konfessııanyń 17-si turady.

Búgingi kúni qalada 184 jergilikti dinı birlestik bar, 115 ǵıbadat orny jumys isteıdi.

1991 jyldan bastap Almatyda dinı birlestikterdiń sany 12 ese ósti.

3 jańa meshit pen bir ǵıbadathananyń qurylysy júrip jatyr.