Almatyda Denıs Tenge eskertkish ornatý úshin ákimdiktiń ruqsaty kerek

 ALMATY. QazAqparat- Medeý muz aıdyny basshylary óz aýmaǵynda qazaqstandyq mánerlep syrǵanaýshy Denıs Tenniń eskertkishin qoıýdy quptap otyr. Biraq bul úshin qala bıliginiń ruqsaty kerek, dep habarlaıdy QazAqparat tilshisi.

«Bizdiń bul bastamaǵa degen kózqarasymyz túzý. Biz jobany tolyq qoldadyq. Biraq memlekettik nysan bolǵandyqtan Almaty bıligine qaraımyz. Qazir biz ákimdikpen kelisip jatyrmyz. Jobany júzege asyrýǵa ruqsat ala salysymen onyń ornyn anyqtaımyz», - dedi Medeý muz aıdynynyń marketıng dırektory Aıgerim Nııazbekova.

Buǵan deıin almatylyqtar Medeý muz aıdynynda Denıs Tenniń eskertkishin ornatý úshin aqsha jınaýdy usynǵan bolatyn.

«Biz Denıs úshin ne isteı alamyz? Meniń qolymnan keletini qaıyrymdylyq qory úshin kraýdfandıng servısin ashý. Denıs Almatynyń tarıhynda qalýǵa tıis, basqasha múmkin emes. Júregimizge qaıǵy ornady. Jas, ádemi, talantty qaharman aramyzdan ketti. Endi ony eske alý úshin, onyń eline jasaǵanyn eskere júrý úshine arnaıy oryn kerek. Ol mundaı qurmetke ábden laıyq. Biz ony qorǵaı almasaq ta jadymyzdan óshirmeıik. Endeshe kútpeı-aq ózimiz Denıstiń eskertkishin ornataıyq jáne kez-kelgen jerde emes, Medeýde!»,-dedi Facebook paraqshasyndaǵy jazbasynda jarnama agenttiginiń dırektory Azıza Ótegenova.

Aqsha kraýdfandıng platformasynyń kómegimen jınalady. Almaty turǵyny barlyq qazaqstandyqtardy jobaǵa atsalysýǵa shaqyrady.