Almatyda «Bıýdjetke qatysý» jobasyna ótinim qabyldaý aıaqtaldy
Almaty qalalyq ákimdiginiń málimetine sáıkes, turǵyndardan aýlalar men qoǵamdyq paıdalaný oryndaryn abattandyrý boıynsha usynystar kóp tústi. Olardyń ishinde sport jáne balalar alańdaryn ornatý-371, kúrkeler men oryndyqtar, qoqys jáshikterin ornatý jáne jóndeý – 324. Odan keıin saıabaqtar men gúlzarlardy jasaýǵa, jóndeýge, kóshe jaryǵyn ornatýǵa, trotýarlar salýǵa, kógaldandyrý men qoqys tastaıtyn jerlerdi joıýǵa baǵyttalǵan jobalar qamtylǵan.
«Qazir baǵdarlamanyń ekinshi kezeńi bastaldy. 21 shilde men 12 tamyz aralyǵynda sarapshylar keńesi ótinimderdiń krıterıılerge sáıkestigin baǵalaýdy jáne aldyn ala ruqsat berý hattamasyn jarııalaýdy júrgizetin bolady. Jobalyq usynystardy pysyqtaý úshin avtorlarǵa 10 kún beriledi. Kelip túsken ótinimder saraptamalyq irikteýden jáne jalpy qalalyq daýys berýden keıin 2023 jyly iske asyrylatyn bolady. Bıyl qala turǵyndarynan 1251 jobalyq usynys tústi. Bul ótken jylmen salystyrǵanda 33 paıyzǵa kóp «,- dep habarlady ákimdikten.
Aıta keteıik jobaǵa ótinim qabyldaý 1 maýsymda bastalǵan bolatyn.
Eske salaıyq, Almaly, Áýezov, Bostandyq, Jetisý, Medeý jáne Túrksib aýdandarynyń árqaısysyna 800 mln teńgeden bólindi. Al qalaǵa qosylǵan aýmaqtardy damytý maqsatynda Naýryzbaı men Alataý aýdandaryna 1,3 mlrd teńgeden qarastyrylǵan. (Jalpy somasy 7,4 mlrd teńge).
