Almatyda bıznesine zalal kelgen kásipkerlerge ótemaqy beriledi

ALMATY. QazAqparat - Almatyda bıznes sýbektilerine kelgen zalal somasyn aıqyndaý jónindegi Óńirlik komıssııanyń otyrysy ótti, dep habarlaıdy QazAqparat tilshisi.

Óńirlik komıssııa tóraǵasy, Almaty qalasy ákiminiń orynbasary Maqsat Qıqymovtyń aıtýynsha, keıbir shaǵyn kásipkerler qansha jáne ne joıylǵanyn, urlanǵanyn qujattaı almaı otyr. Mundaı jaǵdaılarda, memlekettik ótemaqy alý úshin, aýdıt pen baǵalaý júrgizý qajet. Biraq bul óte kúrdeli protsedýra, oǵan kóp ýaqyt ketedi.

«Biz shaǵyn kásipkerler úshin iri bıznesten kómek surap, olarǵa júgindik. Vıacheslav Kım men Mıhaıl Lomtadze birden jaýap berdi. Olar 450 shaǵyn kásipkerge 3 mln teńgege deıingi shyǵyn somasymen bıýrokratııalyq protsedýrasyz tez kómektesý úshin ózderiniń jeke qarajatynan 579 mln teńge bólýdi sheshti. Bul tártipsizdik kezinde zardap shekken barlyq bıznes sýbektileriniń 28%-yn quraıdy. Osy qoldaýdyń arqasynda, biz barlyq ótinimderdiń úshten birin jabamyz», - dedi Maqsat Qıqymov.

Aldyn ala berilgen málimetter boıynsha, Almatyda tártipsizdik pen tonaý saldarynan 1581 kásipkerlik sýbektisi zardap shekti. Shyǵyn somasy 45,6 mlrd. teńgeni qurady. Zalal somasyn aıqyndaý jónindegi Óńirlik komıssııa zardap shekken obektiler boıynsha, onyń ishinde, jergilikti jerlerge shyǵa otyryp, derekterdi jınaýdy jalǵastyrýda.