Almatyda bıznes-ıdeıalardy júzege asyrýǵa 950 grant bólindi

ALMATY. QazAqparat – Almatyda bıznes-ıdeıalardy iske asyrý úshin grant alýǵa ótinim qabyldaý bastaldy. Oǵan 29 jasqa deıingi jastar jáne halyqtyń áleýmettik osal toptarynyń ókilderi úmitker bola alady. Grant somasy 1 225 200 teńge, dep habarlaıdy QazAqparat tilshisi.

Granttar berý jumyspen qamtýdy qamtamasyz etý jáne halyqtyń tabysyn ósirý maqsatynda kásipkerlikti damytý jónindegi Ulttyq jobany iske asyrý aıasynda júrgiziledi.

«ShOB qala ekonomıkasynda jetekshi orynǵa ıe jáne munda 10 almatylyqtardyń 6-aýy isteıdi. Osy jyldan bastap granttardy sertıfıkatsyz alýǵa bolady. Ótinimder sáýir men qarasha aıy aralyǵynda qabyldanady, naqty merzimderi men kezeńderin qosymsha habarlaımyz», – dep atap ótti Almaty qalasy ákimdiginiń halyqty jumyspen qamtý ortalyǵy dırektorynyń orynbasary Zafar Appazov.

Ótinimdi business.enbek.kz portaly arqyly berýge bolady.

Grant alý úshin mynalar qajet:

- tirkelgen jumyssyz mártebesi nemese merzimi 1 jyldan aspaıtyn JK bolýy;

- Almaty qalasynda turaqty, ýaqytsha (1 jyldan kem emes) tirkelý;

- business.enbek.kz portalynda tirkelý;

- bıznes-jospardyń bolýy.

Úmitkerler bıznes-jospardy ózderi derbes jasaıdy jáne BUSINESS.ENBEK.KZ. portalyna ótinim jiberedi. Ótinimderdi qaraý merzimi - 10 jumys kúni.

Granttardy komıssııanyń sheshimi negizinde Halyqty jumyspen qamtý ortalyǵy beredi.

Komıssııa músheleri bıznes-jospardy kelesi krıterııler boıynsha baǵalaıdy:

-bıznes-ıdeıanyń básekege qabilettiligi;

- ótkizý naryqtarynyń pysyqtalýy;

- bıznes-jobanyń qarjylyq ómirsheńdigi;

- kásipkerlik daǵdylar deńgeıi;

- jańa jumys oryndaryn qurý.