Almatyda bıyl turǵyn úı sektorynda 325 ret órt shyqty
Qalalyq tótenshe jaǵdaılar departamentiniń málimetinshe, jalpy órttiń 55%-y turǵyn úı sektorynda bolady.
«Jylytý kezeńinde monshalar, saraılar, ýaqytsha qurylymdar jáne t.b. jıi janady. Órttiń jalpy sanynyń 21%-y kóp páterli úılerde bolady. Órttiń shyǵý sebepteri – elektr symdarynyń qysqa tuıyqtalýy jáne turmystyq tehnıkanyń aqaýlyǵy, otpen abaısyz áreket etý. Atap aıtqanda, janyp turǵan shamdy qaraýsyz qaldyrý, balkonda temeki shegý, peshterdiń durys jumys istemeýi (murjanyń durys ornalastyrylmaýy, peshtiń janǵysh qurylys zattarymen salynýy) bolyp tabylady. Mundaı órt qaýipsizdigin buzý QR ÁQBtK-niń 410-babyna sáıkes ákimshilik jaýapkershilikke ákeletinin eskertemiz», - dep habarlady vedomstvodan.
Osy oraıda, almatylyq qutqarýshylar turǵyndardy órt qaýipsizdiginen habardar etýdiń jańa ádisin oılap tapty. Pıtstsaǵa tapsyrys bergen turǵyndarǵa taǵammen birge órt qaýipsizdigi týraly jadnamalar da jetkiziletin bolady. Bul ıdeıany kýrerlik kompanııa da qoldap otyr.
«Azyq-túlikten basqa, almatylyqtar kórneki túrli-tústi býkletter alady. Jadnamalarda qaıǵyly jaǵdaılarǵa jol bermeýge baılanysty qysqasha naqty usynystar jazylyp, beınelengen. Atap ótý kerek, bul – jarnama emes, birlesken is-shara. Bostandyq aýdanynyń ózinde kýrerlerge taratý úshin 4 myńnan astam jadnama tabystaldy», - dep habarlady Almaty qalalyq TJD-nyń baspasóz qyzmeti.
