Almatyda birqatar marshrýttyń avtobýstary jańarady

ALMATY. QazAqparat- Qyzmet kórsetý sapasyn arttyrý maqsatynda 20 jeltoqsannan bastap birneshe baǵyttyń avtobýstary jańarady, dep habarlaıdy QazAqparat tilshisi.

Medeý aýdanynda ornalasqan Kamenskoe plato, Aqtóbe aýyly, Qaıyń toǵaıy, Taýjoly shaǵynaýdandary men Soǵys ardagerleri gospıtali mańynda turatyn turǵyndarǵa kórsetiletin qyzmet sapasyn arttyrý úshin 2022 jyldyń 20 jeltoqsannan bastap kelesi marshrýttarda jańa avtobýstar shyǵady:

№5 marshrýt «Qaldaıaqov – Jibek joly kóshesi men Aqtóbe aýyly», №5a «Qaldaıaqov kóshesi – Jibek joly kóshesi – Soǵys ardagerleri gospıtali», №5b «Jibek joly kóshesi – Soǵys ardagerleri gospıtali», №5v «Qaıyń toǵaıy –Dostyq dańǵyly - Ospanov kóshesi», №26 «№7 qalalyq aýrýhana – Ekologııalyq post».

Almaty qalalyq mobıldilik basqarmasynyń málimetinshe, sońǵy aılarda atalǵan marshrýttarda josparly jyljymaly birliktiń jolǵa shyǵýy 50% deıin tómendegendikten, marshrýttardy Issýzý N-40 markaly jańa 19 avtobýspen qyzmet kórsetetin «Saparshy» JShS tasymaldaýshy kompanııasyna berý týraly sheshim qabyldandy.

Sonymen qatar, №5 marshrýtqa 4 jyljymaly birlik, №5a men №5v marshrýttaryna 2, №5b marshrýtyna 3 jáne №26 marshrýtqa 5 avtobýs shyǵarý qarastyrylǵan.

«Qalalyq mobıldilik basqarmasy qyzmet kórsetý sapasyn arttyrý men júris jıiligin arttyrý baǵytynda birqatar shara qabyldap jatyr. Marshrýttarda týyndaǵan máseleler kezeń kezeńmen sheshimin tabatyn bolady»,- dep atap ótti vedomstvodan.

Buǵan deıin qala ákimi Erbolat Dosaev Túrksib aýdanynyń turǵyndarymen kezdesýi barysynda Almatyǵa 300 jańa avtobýs satyp alynatynyn aıtqan bolatyn.