Almatyda bir táýlikte úsh myńnan astam adam vaktsına saldyrdy

ALMATY. QazAqparat - Almaty qalasynda bir táýlikte 3609 adam koronavırýsqa qarsy vaktsına saldyrdy. Bul týraly qalalyq qoǵamdyq densaýlyq saqtaý basqarmasy málim etti, dep habarlaıdy QazAqparat tilshisi.

«2 qarasha kúni 3609 almatylyq vaktsına saldyrdy. Koronavırýsqa qarsy ekpeniń І komponentin – 1296 adam, II komponentin 2313 adam aldy. Bıylǵy jyldyń 1 aqpany men 1 qarashasy aralyǵynda qalada 996 486 turǵyn vaktsınanyń birinshi komponentin, 930 466 adam ekinshi komponentin saldyrǵan. Onyń ishinde 120 544 adamnyń jasy 60-tan asqan»,- dep habarlady basqarmadan.

Qalada 137 pýnkt jumys istep tur. 733 adamnan turatyn 205 egý brıgadasy bar. «Qazir medıtsına uıymdarynda, mádenıet, sport obektilerinde, bazarlar men qalanyń SOSO-da vaktsınatsııa pýnkti jumys isteıdi», - dep naqtylady densaýlyq saqtaý basqarmasynyń baspasóz qyzmeti.