Almatyda bir táýlik ishinde 152 jasóspirim polıtsııaǵa jetkizildi

ALMATY. QazAqparat – Almatyda «Túngi qaladaǵy balalar» is-sharasynyń alǵashqy kúni 152 jasóspirim polıtsııaǵa jetkizildi, dep habarlaıdy QazAqparat tilshisi.

Almatyda 17-19 shilde aralyǵynda kámeletke tolmaǵandar arasyndaǵy quqyq buzýshylyqtyń jolyn kesý jáne aldyn alý boıynsha jedel-aldyn alý is-sharasy júrgizilip jatyr. Ol boıynsha saıabaqtardy, alańdardy, qaraýsyz qalǵan úıler men jasóspirimder júrýi múmkin basqa da jerler tekseriledi. Bul týraly Almaty qalalyq polıtsııa departmentiniń Jergilikti polıtsııa qyzmeti basqarmasy bastyǵynyń orynbasary, polıtsııa polkovnıgi Dıas Dýanbekov aıtty.

«Bir táýlik ishinde ishki ister organdaryna 152 jasóspirim jetkizilip, 138 ákimshilik quqyq buzýshylyq anyqtaldy. 9 jasóspirim arnaıy esepke alyndy. Qaraýsyz jáne panasyz qalǵany úshin 11 bala kámeletke tolmaǵandardy beıimdeý ortalyǵyna ornalastyryldy», - dedi polıtsııa polkovnıgi Dıas Dýanbekov.