Almatyda bir mezette 7 myń adam qulshylyq ete alatyn meshit salynyp jatyr

ALMATY. QazAqparat - Qazaqstan musylmandary dinı basqarmasynyń Tóraǵasy Naýryzbaı qajy Taǵanuly Almaty qalasyna jasaǵan resmı saparynda Alataý aýdanynda salynyp jatqan jańa záýlim meshittiń qurylysymen tanysty, dep habarlaıdy QazAqparat tilshisi QMDB baspasóz qyzmetine silteme jasap.

Bas múftı jańa meshittiń qazaqy naqyshta salynýyna nazar aýdardy. Sonymen qatar jamaǵatqa qolaıly kólik turaǵynyń bolýyna kóńil bóldi.

Aıta ketsek, Alataý aýdanynda boı kóterip jatqan qulshylyq úıinde bir mezette 7 myń adam namaz oqı alady. Meshittiń qurylys jumysyn osy jyldyń jeltoqsan aıynda bitirý josparlanǵan.

Ǵımarattyń jalpy alańy – 16 myń sharshy metr. Arhıtektýralyq jobaǵa sáıkes, meshitte bıiktigi 75 metrlik birneshe munara bolady. Keshenniń ortalyq bóliginde 9 kúmbezdi negizgi ǵımarat ornalasady.

Sondaı-aq onyń quramyna ıslam kitaphanasy, ákimshilik bólik, namaz oqıtyn zaly bar áıelder korpýsy, dinı rásimder ótkizýge arnalǵan zal, oqý-aǵartý toptaryna arnalǵan jáne medrese synyptary bar erler bóligi, sondaı-aq, sheberhana men dúkender kiredi.

QMDB Tóraǵasy Naýryzbaı qajy Taǵanuly meshittiń qurylysymen tanysqan soń Almaty qalasynyń jańadan taǵaıyndalǵan bas ımamy Tólebı Ospanǵa naqty tapsyrmalar berdi.