Almatyda bir aýrýhanada Táýelsizdiktiń 57 tól qurdasy jumys isteıdi
№7 qalalyq klınıkalyq aýrýhana 1991 jyly paıdalaýǵa berilgen. Búgingi kúni onda 1800-den astam qyzmetker jumys isteıdi, onyń 57 -si Táýelsizdikpen qurdas jas kadrlar.
«Bizdiń jastar ózderin bolashaq bilikti maman ekenderin pandemııa kezinde dáleldedi. Búkil álem kúresip jatqan koronavırýs ınfektsııasynyń aldyn alýǵa jáne emdeýge olar da atsalysty. Jas dárigerler, terapevter, endokrınologtar, kardıologtar tájirıbeli áriptesteriniń basshylyǵymen jedel járdem bólmesiniń, «las aımaqtar» dep atalatyn klınıkanyń jáne ýaqytsha juqpaly aýrýlar bólimsheleriniń jumysyna baryp, klınıkada aldyńǵy qatarda júrdi. Olardyń barlyǵy alǵashqy kúnnen bastap ózderiniń jaýapkershilikterin sezinip, aýyr jumysqa daıyn boldy. Dárigerler koronavırýs pandemııanyń jańa satylaryna oqytyldy»,- dep atap ótti aýrýhananyń baspasóz qyzmeti.
Koronavırýs ıfektsııasyn juqtyrǵandardy emdeýmen aınalysatyn dárigerlerdiń biri Uljan Apbasova.
«Men №7 qalalyq klınıkalyq aýrýhanada 5 jyldan beri jumys isteımin. Qazirgi ýaqytta №1 ınfektsııalyq bólimin basqaramyn. Bizge júktelgen mindettiń jaýapkershiligi zor. Ár naýqastyń ómiri úshin kúresemiz. Pandemııa bastalǵaly bizdiń bólimde koronavırýs juqtyrǵan 1500 naýqas emdelip shyqty. Bizge patsıentterimiz, olardyń týystary rahmet aıtyp jatady. Bul álbette bizdiń bolashaq jumysymyzǵa úlken serpin beredi, shabyttandyrady», - deıdi Uljan Apbasova.
Táýelsizdiktiń taǵy bir qurdasy terapevt-nefrolog Laýra Garajaevanyń aıtýynsha bastapqyda dárigerler koronovırýspen kúresýge psıhıkalyq turǵydan daıyn bolmady.
«Bastapqyda barlyq medıtsınalyq qyzmetkerler koronavırýspen jumys isteýge psıhıkalyq jaǵynan daıyn bolmady. Belgisiz vırýs, buryn zerttelmegen aýrý, búkil álem onymen alǵash ret kezdesti. Álemdegi medıtsına bul qaýipti ınfektsııany qalaı tıimdi emdeý kerektigin bilmedi. Biz de qoryqtyq. Biraq biz kásibı mindetimizdi ózgerte almaıtynymyzdy túsindik jáne «qyzyl aımaqqa» barýǵa kelisim berdik.Tájirıbeli áriptesterimizdiń nusqaýlary, klınıka basshylyǵynyń, QR Densaýlyq saqtaý mınıstrliginiń ádistemelik usynymdarynyń jáne emdeý hattamalarynyń arqasynda biz, jas dárigerler, tez jınalyp, senimdi túrde azamattarymyzdy qutqarýǵa bel sybana kirisip kettik. Bul jumys osy kúnge deıin jalǵasýda», - deıdi Laýra Garajaeva.
Taǵy bir keıipkerimiz Aıbek Turalıev Almatydaǵy qazaq medıtsınalyq úzdiksiz bilim berý ýnıversıtetiniń neırohırýrgııa rezıdentýrasyn bitirgen. Onyń aıtýynsha, rezıdentýrada oqytý úderisi ońaı bolǵan joq.
«Men №7 qalalyq klınıkalyq aýrýhanasynda 4 jyl rezıdentsııada boldym, úlken medıtsına áleminde óz ornymdy shamaly bolsa da taptym. Osy ýaqytqa deıin men mı jáne julynǵa, sondaı-aq mı tamyrlaryna 1000-ǵa jýyq ashyq jáne az ınvazıvti operatsııalarǵa kómek kórsettim. Óz betimen 60-qa jýyq mı operatsııasyn jasadym», - dedi jas neırohırýrg.
Atalǵan aýrýhanada jumys isteıtin Táýelsizdiktiń qurdastary elimizben birge eseıgenderin aıtady.
«Adam balasynyń dúnıege kelýi nemese ómirden ótýi onyń erkinen tys tabıǵı qubylys. Áıtse de men dál 1991 jyly dúnıege kelgenimdi taǵdyrdyń erekshe syıy dep túsinemin.Táýelsizdiktiń qurdasy ekenim maǵan tereń jaýapkershilik júkteıdi. Elmen birge eseıý – ekiniń biriniń mańdaıyna buıyra bermeıtin baqyt. Saıası turǵydan alǵanda Táýelsizdik bizge eń aldymen Elbasyn, ózimiz tańdap saılaý quqyǵyn berdi. Táýelsizdiktiń basty nyshandarynyń biri memlekettik derbes týy men Eltańbasy jáne ánurany bolýy. Bizdiń boıymyzda memlekettik rámizderge degen qurmet pen oǵan uqyptylyqpen qaraý, aıaq asty etpeý sekildi qasıetter ornyqty dep sanaımyn»,- deıdi neırohırýrg Erkebulan Merkibekov.
